Bakı. Trend:
Beynəlxalq Muğam Mərkəzində, Mərkəzin “Qəzəllər” layihəsi çərçivəsində şair-qəzəlxan, əməkdar incəsənət xadimi Əliağa Vahidin qəzəlləri mövzusunda gözəl konsert keçib.
Mərkəzdən Trend-ə verilən məlumata görə, konsertdə əməkdar artist Ehtiram Hüseynov və Azərbaycan Televiziyası və Radiosunun solisti Kamilə Nəbiyeva Əliağa Vahidin qəzəllərinə “Rast” dəstgahını ifa ediblər.
Xanəndələri tarda Əliağa Sədiyev, kamançada Elşən Mansurov, nağarada Yusif Əzizov müşayiət ediblər.
Əliağa Vahidin qəlbləri fəth edən qəzəlləri, şux təsnif və rənglər konserti unudulmaz və rəngarəng edib.
Tədbir qəzəlsevərlər üçün çox maraqlı keçib və gur alqışlarla qiymətləndirilib.
Beynəlxalq Muğam Mərkəzinin “Qəzəllər” layihəsinin hər təqdimatında tanınmış və gənc xanəndələrin ifasında tamaşaçılara qəzəl üslubunda gözəl poeziya nümunələri yaratmış dahi Azərbaycan klassik şairlərinin əsərlərinin təqdim edilməsi davam edəcək.