Azərbaycan, Bakı, 20 sentyabr /Trend/
Əfqanıstanda "Taliban"la müzakirələrə rəhbərlik edən Ali Sülh Şurasının başçısı, sabiq prezident Bürhanəddin Rəbbani paytaxt Kabildəki evində partlayıcı qurğunun işə düşməsi nəticəsində dünyasını dəyişib.
Trend-in məlumatına görə, Əfqanıstanın məsul şəxsləri bildiribləri ki, hadisə əsnasında Rəbbani iki "Taliban" üzvü ilə danışıqlar aparıb. Ancaq bu şəxslərin həmin hadisədə iştirak edib-etmədiyi hələ məlum deyil. Bəzi mənbələr bunun terrorçu-intiharçı hücumu olduğunu bildirirlər. Keçmiş prezident Rəbbani eyni zamanda müxalifət lideri idi.
Bu yaxınlarda İranda dini konfransda iştirak edən Rəbbani müsəlman din xadimlərini terrorçu-intiharçı hücumlarına qarşı birləşməyə çağırmışdı.
Hazırkı prezident Həmid Kərzai Ali Sülh Şurasını əfqan xalqının ən böyük ümidi kimi xarakterizə edərək, "Taliban"ı bu fürsəti əldən verməməyə çağırıb.