Azərbaycan, Bakı, 6 dekabr /Trend/
Bu gecə Şəmkirdə yol nəqliyyat hadisəsi baş verib. "VAZ" markalı avtomobil yol kənarında dayanan yük avtomobilinin iki sərnişinini vuraraq hadisə yerindən qaçıb.
Trend Kəpəz TV-yə istinadən xəbər verir ki, hadisə "su anbarı yolu" adlanan yerdə baş verib.
Rayonun Nərimanlı kənd sakinləri Adil Qasımov, Ruslan Qasımov və Yolçu Mustafayev "ZİL" markalı yük maşını ilə Seyfəli kəndinə ot bağlamaları gətiriblər. Otu satıb qayıdan Nərimanlı kənd sakinləri yolda yük maşınında yaranan texniki problemi aradan qaldırmaq üçün dayanıblar.
Bu zaman Seyfəli kəndi istiqamətindən yüksək sürətlə gələn "VAZ 2106" yol kənarında dayanan Ruslan Qasımovu və Yolçu Mustafayevi vurub. Yaralılar dərhal Gəncə şəhər Təcili Tibbi Yardım Xəstəxanasının Travmatologiya şöbəsinə yerləşdiriliblər.
"ZİL"-in sürücüsü Adil Qasımov onun sərnişinlərini vuraraq qaçan avtomobilin dövlət nömrə nişanını gördüyünü bildirib.
Baş vermiş yol qəzası ilə bağlı Şəmkir polisinə zərəçəkmişlər tərəfindən məlumat verilib. Faktla bağlı araşdırmalar aparılır.