Bakı. Samir Əli - Trend:
Bu gün Bakı Ağır Cinayətlər Məhkəməsində oğurluqda təqsirləndirilən Sadiq Ağayev, Qaməddin Əliyev və Məhəbbət Əliyevin cinayət işi üzrə məhkəmə prosesi başa çatıb.
Trend-in məlumatına görə, hakim Şəkər Məmmədovanın sədrliyi ilə keçirilən prosesdə təqsirləndirilən şəxslərə hökm oxunub.
Məhkəmənin hökmü ilə təqsirləndirilən şəxslərin hər bir 8 il müddətinə azadlıqdan məhrum edilib.
Qeyd edək ki, bu ilin fevral ayında paytaxt sakini Nizami Qasımova məxsus "Toyota" markalı avtomobildən 80 min ABŞ dolları oğurlanıb. Hadisədən sonra polis əməkdaşlarının əməliyyat-axtarış tədbirləri nəticəsində paytaxt sakinləri S.Ağayev, M.Əliyev və Füzuli rayon sakini Q.Əliyev tutulublar.
Təqsirləndirilən şəxslər Cinayət Məcəlləsinin 177.3.2-ci (oğurluq, külli miqdarda ziyan vurmaqla törədildikdə) maddəsi ilə ittiham olunublar.