Beyləqan. Trend:
Beyləqan rayonunda məktəblilər arasında yaranmış mübahisə zamanı baş verən bıçaqlanma hadisəsi qeyri dərs saatında və məktəbdən kənar ərazidə baş verib.
Trend-in Qarabağ bürosunun xəbərinə görə, bu barədə Beyləqan rayon təhsil sektorunun müdiri Elvin Abbasov jurnalistlərə məlumat verib.
O qeyd edib ki, Beyləqan şəhərində 11-ci sinif şagirdinə xəsarət yetirilməsi ilə bağlı məlumat yayılıb.
Məsələ ilə bağlı bildiririk ki, 14 oktyabr 2024-cü il tarixində saat 14:00-15:00 radələrində məktəbdənkənar ərazidə Beyləqan şəhər F. Hacıyev adına 2 nömrəli tam orta məktəbin 7-ci sinif şagirdi həmin təhsil müəssisəsinin 11-ci sinif şagirdinə aralarında yaranmış mübahisə zəminində xəsarət yetirib.
"Xəsarət alan məktəbli tibb müəssisəsinə yerləşdirilib. Məsələ ilə bağlı hüquq-mühafizə orqanlarına məlumat verilib. Beyləqan rayon təhsil sektorunun əməkdaşları və məktəb rəhbərliyi tərəfindən məktəbliyə baş çəkilib, valideynlə söhbət aparılıb.
Xəsarət almış şagirdin fiziki və psixoloji durumu məktəb rəhbərliyi və idarə tərəfindən izlənilir.
Qeyd olunanlarla yanaşı, stressin idarə olunması, sağlam
psixoloji mühitin bərpasını təmin etmək üçün məktəb rəhbərliyinə
şagirdlər və pedaqoji heyətlə maarifləndirici söhbətlərin
aparılması tapşırılıb.
Hadisə ilə bağlı hüquq-mühafizə orqanları tərəfindən araşdırma
aparılır. Araşdırmanın nəticələri aidiyyəti qurumlar tərəfindən
ictimaiyyətə veriləcək.
Uşaqların yeniyetməlik dövru olduğunu, araşdırma prosesinin davam etdiyini nəzərə alaraq ictimaiyyətdən də bu mövzuda daha həssas davranmalarını xahiş edirik", - təhsil sektorunun müdiri əlavə edib.
xxx
13:23
Beyləqanda məktəblilər arasında baş verən mübahisə bıçaqlanma ilə nəticələnib.
Trend-in yerli müxbirinin xəbərinə görə, hadisə Beyləqan rayonunun mərkəzi ərazisində qeydə alınıb.
Belə ki, rayon sakini Beyləqan rayon 2 saylı məktəbin 11-ci sinif şagirdi Hüseynov Haldun həmyerlisi 7-ci sinif şagirdi Qasımlı Hüseyn tərəfindən bıçaqlanıb.
Hadisə dərs vaxtından sonra baş verib. H.Qasımlı polis əməkdaşları tərəfindən saxlanılıb.
Faktla bağlı Beyləqan RPŞ-də araşdırma aparılır.