Azərbaycan, Bakı, 08 iyul/ Trend , müxbirlər A.Əliyev, E.Babayev/ Rəsmi Bakı ATƏT-in Dağlıq Qarabağ münaqişəsinin həlli ilə bağlı mövqeyindən razı deyil. "Biz ATƏT- dən qətiyyətli mövqe gözləyirik. ATƏT, Avropada təhlükəsilik və əməkdaşlıq məsələləri ilə məşğul olan əsas təşkilat kimi, Azərbaycanın pozulmuş hüquqlarının bərpası istiqamətində və BMT-nin mandatına müvafiq olaraq fəaliyyət göstəməlidir"- çərşənbə axşamı Trend -a Prezidentin İcra Aparatının ictimai-siyasi şöbəsinin müdiri Əli Həsənov bildirib.
Trend -un arayışı: Dağlıq Qarabağ münaqişəsinin sülh yolu ilə tənzimlənməsi üçün 1992-ci ildə ATƏT çərçivəsində 10-a yaxın ölkənin iştirakı ilə Minsk Qrupu yaradılıb, 1997- ci ildən Minsk qrupunda üç ölkə - ABŞ, Rusiya və Fransa təmsilçilərindən ibarət həmsədrlər fəaliyyət göstərir.
Həsənov bildirib ki, ATƏT qətiyyətli mövqe tutmalıdır: "ATƏT- dən tələb edirik ki, mövqeyini qətiləşdirsin. Qətiyyətli mövqe nümayiş etdirsin" - Prezidentin İcra Aparatının ictimai-siyasi şöbəsinin müdiri əlavə edib.
Həsənovun sözlərinə görə, Azərbaycan dünyanın iqtisadi, siyasi və enerji təhlükəsizliyində ciddi amilə çevrilib. "Bundan isə biz məharətlə istifadə etməliyik. Xüsusilə də, ən böyük problemimiz olan Dağlıq Qarabağ münaqişəsinin həllində"- deyə o əlavə edib. Həsənov deyib ki, bütün dövlət orqanları, ictimai-siyasi qurumlar, Azərbaycanın elm ictimaiyyəti beynəlxalq əlaqələrdə mütləq Azərbaycanın ərazi bütövlüyü məsələsini qaldırmalıdır. "Bu, dövlət siyasətinin tələbidir"- deyən Həsənov onu da qeyd edib ki, beynəlxalq təşkilatları Azərbaycanın pozulmuş hüquqlarının bərpası sahəsində fəal mövqe nümayiş etdirməyə çağırır.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988 -ci ildən başlayıb, 1991- ci ilin dekabrınadək, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-93-cü illərdə isə, Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994- cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Məqalə müəllifi ilə əlaqə ünvanı: [email protected]
