Trend-in Avropa redaksiyasının icmalçısı Elmira Tariverdiyeva
Güman edildiyi kimi, Moskva yeni ildə də Ermənistan-Azərbaycan, Dağlıq Qarabağ münaqişəsinin nizamlanması prosesində ən fəal vasitəçi rolunu qorumaq niyyətindədir. Bu münaqişənin Rusiyanın xarici siyasətinin prioritetləri sahəsinə daxil olması göz qabağındadır.
2010-cu ilin sonunda Rusiya Xarici İşlər Nazirliyinin rəsmi saytında 2010-cu ilin 24 əsas xarici siyasət hadisəninin siyahısı dərc edilib. Onların sırasında Dağlıq Qarabağ ətrafındakı danışıqlar prosesi də göstərilib.
"RF, Azərbaycan və Ermənistan prezidentləri Dmitri Medvedev, İlham Əliyev və Serj Sarkisyanın yanvarın 25-də Soçidə, iyunun 17-də Sankt-Peterburqda, oktyabrın 27-də Həştərxanda Dağlıq Qarabağ münaqişəsinin nizamlanması üzrə keçirdikləri üçtərəfli görüşlərlə bağlı Rusiyanın vasitəçilik fəaliyyətinin davam etdirilməsi yüksək beynəlxalq qiymət alıb", - XİN-in məlumatında deyilir.
Ermənistan və Azərbaycan arasındakı münaqişənin bundan sonra da Kremlin diqqət mərkəzində olacağına şübhə yoxdur. Rusiyanın xarici işlər naziri Sergey Lavrov artıq danışıqlar prosesinə aid yaxın vaxtlara olan planlar haqqında məlumat verib.
2010-cu ilin son günü "Rusiya-24" telekanalına ilin yekunları üzrə müsahibəsində nazir deyib ki, yanvarda öz azərbaycanlı və erməni həmkarı ilə Dağlıq Qarabağ münaqişəsinin nziamlanması üzrə növbəti görüşü keçirəcəyinə ümid edir.
Obyektiv şəraitə görə il şübhəsiz ki, Dağlıq Qarabağ münaqişəsinin ən fəal vasitəçisi kimi Rusiya üçün uğurlu olacaq. Ötən il Dağlıq Qarabağ münaqişəsinin həllində ATƏT-in Minsk qrupunun digər həmsədrləri - ABŞ və Fransanın fəal iştiraka şansı qalırdısa, bu il Vaşinqton və Paris yəqin ki diqqətlərini daxili problemlərə yönəltməli olacaqlar.
ABŞ gələn il prezident seçkilərinin sonuncu fazasına daxil oacaq. Seçkiqabağı kampaniyaya hazırlıq Vaşinqtonu seçkilərin nəticələrinə təsir göstərə biləcək məsələləri tələsik həll etməyə məcbur edəcək. İlk növbədə bu, koalisiya qüvvələrinin Əfqanıstandan çıxarılması, ABŞ-da işsizlik problemi, ölkədə iqtisadi vəziyyətin yaxşılaşdırılması məsələlərinə aiddir.
Hadisələrin belə cərəyan edəcəyi halda indiki administrasiyanın iki Cənubi Qafqaz ölkəsi arasında danışıqlar prosesində rolunun güclənməsi üçün imkanlarının qalacağına ümid etməyə dəyməz. ABŞ çox güman ki, yalnız ATƏT-in Minsk qrupunda iştirak etməklə həmsədr rolunu yerinə yetirməkdə davam edəcək.
Bu, 2012-ci ildə prezident seçkilərini gözləyən Minsk qrupunun ikinci həmsədri Fransaya da aiddir. Fransa Prezidenti Nikola Sarkozinin Moskva və Tbilisi arasında danışıqlar aparan rolunda şəxsən çıxış etdiyi 2008-ci ildə beynəlxalq oyunçu kimi rolunun fəallaşmasından sonra vəziyyət dəyişib.
Ötən il Prezident Sarkozi üçün asan sınaq ili olmayıb. Maliyyə böhranı hakimiyyəti son iki il ərzində populyar olmayan addımlar atmağa məcbur etdi. Lakin ölkədə geniş etiraza səbəb olan makroiqtisadi vəziyyətin sabitləşməsi üzrə görülən tədbirlər müsbət nəticələr vermədi: işsizlik artır, əhalinin gəlirləri azalır.
Ən yaxın vaxtlarda Avropada iqtisadi vəziyyət sabitləşməsə, Fransa pis proqnozlara əsasən, Aİ-dən maliyyə yardımına ehtiyacı olan ölkələr siyasında növbəti ölkə olacaq.
Çox güman ki, 2011-ci ildə Prezident Sarkozinin siyasəti müstəsna olaraq daxili siyasət vəzifələri ətrafında qurulacaq: ahıllara yardım probleminin həlli, yəni pensiya islahatı, daşınmaz əmlaka olan vergidə islahatların aparılması və ədliyyə islahatları.
Bu baxımdan 2012-ci ildə prezident seçkilərinin keçiriləcəyi Rusiya Bakı və Yerevan arasında ən fəal danışıqlar aparan rolunda mövqeyini möhkəmləndirmək üçün bütün imkanlara malikdir.
Rusiyada seçkiqabağı vəziyyət Minsk qrupunun həmsədri olan digər iki ölkədə olan vəziyyətdən köklü şəkildə fərqlənir. Keçmiş Sovet İttifaqı ölkələrinin işində iştirak çox güman ki, Kremlin imici üçün xeyirlidir. Prezident Dmitri Medvedevin göstərdiyi "üstün maraqlar zonası" Rusiya sakinlərinin düşüncəsində yad ölkələr deyil, köməyin göstərilməsinin lazım olduğu yaxın qonşulardır.
Bütün bu deyilənləri nəzərə alaraq, 2011-ci ildə Dağlıq Qarabağ ətrafında sülh prosesi üzrə təşəbbüslərin əksəriyyəti yəqin ki, məhz Rusiyaya məxsus olacaq.
