Azərbaycan, Bakı, 7 may /Trend, müxbir M.Əliyev/
Dağlıq Qarabağ münaqişəsinin nizamlanması NATO Parlament Assambleyasının payız sessiyasının gedişində müzakirə oluna bilər. Trend-in məlumatına görə, bu barədə şənbə günü jurnalistlərə birinci vitse-spiker, Milli Məclisin Təhlükəsizlik və müdafiə komitəsinin sədri Ziyafət Əsgərov deyib.
"Hərçənd ki, payız sessiyasının gedişində bu məsələnin müzakirəsi planlaşdırılmır, lakin biz bu məsələni NATO PA-nın payız sessiyasının gündəliyinə daxil etməyə çalışacağıq", - Əsgərov bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.