...

RF-də prezident seçkilərinin yekunları Dağlıq Qarabağ məsələsində Moskva üçün böhran amili olmayacaq - rusiyalı ekspert

Ermənistan-Azərbaycan münaqişəsi Materials 11 İyul 2011 16:12 (UTC +04:00)
2012-ci ildə RF-də prezident seçkilərinin yekunları Dağlıq Qarabağ münaqişəsinin nizamlanması məsələsində Moskvanın səyləri üçün vacib böhran amili olmayacaq.
RF-də prezident seçkilərinin yekunları Dağlıq Qarabağ məsələsində Moskva üçün böhran amili olmayacaq - rusiyalı ekspert

Azərbaycan, Bakı, 11 iyul /Trend, müxbir E.Tarıverdiyeva/

2012-ci ildə RF-də prezident seçkilərinin yekunları Dağlıq Qarabağ münaqişəsinin nizamlanması məsələsində Moskvanın səyləri üçün vacib böhran amili olmayacaq. Rusiyalı politoloq Mixail Remizov belə hesab edir.

"Mən Moskvanın Dağlıq Qarabağ münaqişəsi tərəflərinə təsir imkanlarını həddindən artıq qiymətləndirməzdim, çünki başlıca problem nizamlamanın heç olmasa nümunə üçün kompromis modelinin olmamasındadır, - Milli Strategiya İnstitutunun direktoru Mixail Remizov Trend-ə bildirib. - Vasitəçilər tərəfindən əlavə stimullar yalnız o halda məna kəsb edərdi ki, həmin model danışıqlar masası üzərində olaydı. Lakin mənim fikrimcə, o mövcud deyil, çünki vəziyyəti izah edərkən tərəflərin mövqeləri bir-birini inkar edir".

Onun sözlərinə görə, bu baxımdan vasitəçilik, təkcə ərazi mübahisəsinin hüquqi həlli üzrə razılaşmanın əldə olunması mənasında deyil, həm də hərbi münaqişənin qızışmasının qarşısının alınmasında çox effektiv ola bilməz.

"Mən yaxın vaxtlarda Dağlıq Qarabağ münaqişəsinin nizamlanması perspektivini görmürəm", - ekspert bildirib.

Lakin, onun sözlərinə görə, Moskva bundan sonra da ona dost olan iki dövlətin - Azərbaycanı və Ermənistanı barışdırmaq üçün öz səylərini davam etdirəcək.

"Bu, Rusiyadakı daxili siyasi vəziyyətdən, eləcə də qarşıdakı prezident seçkilərindən asılı deyil. Ola bilsin ki, Medvedev beynəlxalq ictimaiyyətin gözündə vasitəçi və sülhməramlı rolunda tanınmasında daha çox maraqlıdır, lakin onun prezidentliyi Moskvanın səylərini davam etdirməsi üçün vacib böhran amil deyil", - Remizov bildirib.

Onun fikrincə, Rusiyanın ona dost olan iki ölkənin müharibə vəziyyətində olmasında maraqlı olmaması daha vacibdir, çünki bu, Rusiya üçün bir çox sahələdə böyük problem olacaq.

Kazanda keçirilən müzakirələrin yekunları üzrə Rusiya Prezidenti Dmitri Medvedev Azərbaycan və Ermənistan prezidentləri İlham Əliyev və Serj Sarkisyana son vaxtlar üç prezidentin formatında və ATƏT-in Minsk qrupu həmsədrlərinin - ABŞ, Rusiya və Fransanın nümayəndələrinin iştirakı ilə müzakirə olunan Dağlıq Qarabağ məsələsinin həllinin görüntüləri haqqında təkliflə məktub hazırlayıb.

Prezidentlər İlham Əliyev, Dmitri Medvedev və Serj Sarkisyan iyunun 24-də Kazanda Dağlıq Qarabağ münaqişəsinin nizamlanmasının əsas prinsiplərini müzakirə ediblər. Son üç il ərzində sayca doqquzuncu olan bu görüş nizamlamanın əsas prinsipləri üzrə razılaşma əldə olunmadan başa çatıb. Birgə bəyanatda tərəflər yalnız bu məqsədə doğru yolda irəliləyişin olduğunu qeyd ediblər.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Xəbər lenti

Xəbər lenti