Azərbaycan, Bakı, 18 iyul /Trend/
ATƏT-in Minsk qrupunun həmsədrləri yaxın günlərdə Ermənistandan Rusiya Prezidenti Dmitri Medvedevin Dağlıq Qarabağ münaqişəsinin nizamlanması üzrə təklifinə cavab alacaqlarına ümid edirlər. Trend-in məlumatına görə, bu barədə bazar ertəsi jurnalistlərə Minsk qrupunun rusiyalı həmsədri İqor Popov Ermənistanın xarici işlər naziri ilə görüşdən sonra bildirib. Məlumatı ARKA yayıb.
Rusiyanın xarici işlər naziri Sergey Lavrov iyulun 8-də Azərbaycan və Ermənistan prezidentləri İlham Əliyev və Serj Sarkisyana RF Prezidenti Dmitri Medvedevin təklif və məktubunu təqdim edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.