Azərbaycan, Bakı, 11 yanvar /Trend, müxbir E.Mehdiyev/
2011-ci ilin dekabr ayı ərzində 3,018,169 kvadratmetr ərazi yoxlanılıb, mina və partlamamış hərbi sursatdan (PHS) təmizlənib. Bu barədə çərşənbə günü Trend-ə Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) mətbuat xidmətindən məlumat verilib.
Bu dövrdə 353 PHS və 8 ədəd tank/6 ədəd piyada əleyhinə mina aşkar edilərək zərərsizləşdirilib.
Əməliyyatlarda 484 nəfər minaaxtaran mütəxəssis və 118 nəfər yardımçı heyət iştirak edir. Həmçinin, əməliyyatlarda 6 mexaniki minatəmizləmə maşını və 36 minaaxtaran it iştirak edir.
İndiyədək cəmi 181,472,035 kvadratmetr ərazi təmizlənib. Tapılıb zərərsizləşdirilmiş mina və PHS-lərin sayı 665,015-dir.
Agentlik tərəfindən təmizləmə əməliyyatları Ağdam, Ağstafa, Ağcabədi, Füzuli, Goranboy, Gədəbəy, Tərtər, Yevlax, Abşeron rayonu Kirdağ Palçıq Vulkanları ərazisində, eyni zamanda, Bakı şəhəri Qaradağ rayonu Güzdək qəsəbəsində davam etdirilir.
2011-ci il ərzində ANAMA tərəfindən təmizləmə əməliyyatları Füzuli, Ağcabədi, Tərtər, Xocavənd, Ağdam, Tovuz və Ağstafa rayonlarında aparılıb və 29,851,117 kvadratmetr ərazi təmizlənib, 24,507 ədəd mina və PHS aşkar edilərək zərərsizləşdirilib.