Azərbaycan, Bakı, 10 yanvar / Trend , müxbir S.İlhamqızı/ Müsavat Partiyası hesab edir ki, builki prezident seçkisində müxalifət adı altında iştirak edən xırda partiyaların seçkidə heç bir şansı yoxdur.
"Gürcüstandan fərqli olaraq, Azərbaycanda xırda müxalifət partiyaları prezident seçkisində ümumi səslərin 6 faizini belə toplaya bilməyəcəklər"-deyə Müsavat Partiyasının mərkəzi icra aparatının rəhbəri Arif Hacılı Trend ə açıqlamasında bildirib.
Müxalifət düşərgəsində iri partiyalardan sayılan Müsavat Partiyası oktyabrda keçiriləcək prezident seçkisində öz namizədi ilə iştirak etmək barədə ötən il qərar çıxarıb.
Müxalifət düşərgəsində təmsil olunan Böyük Quruluş, Bütöv Azərbaycan Xalq Cəbhəsi, Ümid və digər partiyalar da prezident seçkisində öz namizədi ilə iştirak etməyə qərar verib.
Hacılının fikrincə, xırda partiyaların prezident seçkisində öz namizədi ilə iştirak etməsinə hakimiyyət şərait yaradır və bu, müxalifətin parçalanması kimi təqdir edilir. Müsavat funksioneri hesab edir ki, 2003-cü il seçkisində olduğu kimi, 2008-ci il prezident seçkisində də namizədlərin sayı çox olacaq, lakin müxalifət adı ilə çıxış edən namizədlərin heç birinin qalib gəlmək şansı olmayacaq. Onun sözlərinə görə, Müsavat Partiyası bu seçkidə partiyanın sədri İsa Qəmbəri ən şanslı namizəd hesab edir.
Ümid Partiyasının sədri İqbal Ağazadə Trend ə açıqlamasında bildirib ki, Müsavat Partiyası ilə hakim Yeni Azərbaycan Partiyasının nümayəndələrinin təfəkkürləri, hadisələrə yanaşma tərzləri eynidir: "YAP da, Müsavat da iddia edir ki, onlardan başqa heç kim yoxdur. Bu cür yanaşma ilə həmin siyasi qüvvələr Azərbaycanı inkişafa doğru apara bilməzlər"-deyə Ümid Partiyasının sədri bildirib.
O, əlavə edib ki, Müsavat funksionerinin iddiasının əksinə olaraq, Qəmbərin seçkidə qalib olacağına inanmır: "Şəxsən mən Müsavat Partiyasının namizədinin seçkidə qalib gələcəyinə əmin olsaydım, seçkiyə qatılmağa qərar verməzdim"-deyə Ağazadə bildirib.
Hakim Yeni Azərbaycan Partiyasının (YAP) icraçı katibi Əli Əhmədov isə Trend ə bildirib ki, indiki prezident İlham Əliyev nəinki hakimiyyətin, cəmiyyətin böyük əksəriyyətinin namizədi olacaq və onun reytinqi hamıdan yüksəkdir: "Prezident seçkisində İlham Əliyevə rəqib ola biləcək namizəd yoxdur"-deyə Əhmədov bildirib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı, Azərbaycan Parlamentinin eks-spikeri (1992-93-cü illərdə) olmuş Qəmbər 2003-cü ildə keçirilmiş prezident seçkisində iştirak edib və qazandığı səslərə görə, 8 namizəd arasında ikinci olub. Partiya hazırda beş nəfər deputatla Parlamentdə təmsil olunur.
Müxalifətçi Ümid Partiyasının sədri Ağazadə 2001-ci ildən bəri Milli Məclisin deputatıdır. O, prezident seçkisində ilk dəfə olaraq iştirak edəcək.
