Azərbaycan, Bakı 28 yanvar/ Trend , müxbir İ.Əlizadə/ Müsavat Partiyası müxalifətin vahid namizədinin müəyyənləşdirilməsi və seçkilərdə vahid namizədlə iştirak etmək ideyasından imtina edib. "Hazırkı mərhələdə müxalifətin vahid namizədinin müəyyənləşdirilməsi haqda aparılan müzakirələr müxalifətin inteqrasiyasına deyil, parçalanmasına xidmət edir" - deyə bazar ertəsi Trend ə açıqlamasında Müsavat Partiyası Mərəkzi İcra Aparatının rəhbəri Arif Hacılı bildirib.
Müxalifət partiyaları arasında vahid namizədin müəyyənləşdirilməsi ideyası bir necə ildir ki, müzakirə olunur. Lakin müxalifət partiyaları və liderlər bu məsələdə razılığa gələ bilmirlər.
Hacılı qeyd edib ki, Müsavat Məclisinin bazar günü keçirilən iclasında partiyanın 2008-ci illə bağlı fəaliyyət planı təsdiq olunub. Fəaliyyət planının əsas hissəsi prezident seçkilərinə hazırlıqla bağlıdır: "Fəaliyyət planında müxalifətin vahid namizədi ideyası əvəzinə vahid elektorant konsepsiyası irəli sürülüb və qəbul olunub. Müsavat Partiyası hesab edir ki, müxalifətin vahid namizədinin müəyyənləşdirilməsindənsə, seçicilərin ən şanslı namizəd ətrafında birləşdirilməsi və ona səs vermələrinin təmin edilməsi daha yaxşıdır".
Onun sözlərinə görə, fəaliyyət planında Müsavatın Seçki Qərargahının yaradılması, onun görəcəyi işlər, seçki dövründəki və seçkidən sonrakı bir həftə ərzində görüləcək işlər əks olunub.
Azərbaycanda prezident seçkisi 2008-ci il oktyabrın 15-də keçiriləcək.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan Parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya dörd deputatla Parlamentdə təmsil olunur.
