Azərbaycan, Bakı 31 yanvar/ Trend , müxbir İ.Əlizadə/ Azərbaycan Parlamenti ölkədə istehsal olunan kənd təsərrüfatı məhsullarının keyfiyyətinin artırılmasını nəzərdə tutan qanun layihəsi hazırlayıb. "İnsanların zəhərlənməsi, müxtəlif xəstəliklərə yoluxma ekoloji cəhətdən təmiz olmayan məhsullardan istifadənin nəticəsidir. Ən təhlükəlisi isə ondan ibarətdir ki, insanlar ekoloji cəhətdən keyfiyyətsiz və orqanizmə mənfi təsir edən məhsullardan istifadə etdiklərindən xəbərsiz olurlar" -deyə cümə axşamı Milli Məclisin Aqrar siyasət məsələləri daimi komissiyasının iclasında "Ekoloji kənd təsərrüfatı haqqında" yeni qanun layihəsinin müzakirəsi zamanı komissiyanın sədri Eldar İbrahimov bildirib.
Komissiya sədri qeyd edib ki, yeni qanun layihəsinin hazırlanmasında məqsəd Azərbaycanda ekoloji cəhətdən təmiz və keyfiyyətli məhsulların istehsal olunmasını təmin etməkdir: "Məhsullar istehsal olunur, lakin onların tərkibinin nədən ibarət olduğu, insan orqanizminə necə təsir etdiyi məlum deyil. Qanun layihəsində keyfiyyətli kənd təsərrüfatı məhsulunun istehsalı mexanizminin yaradılması, keyfiyyətsiz məhsul istehsalının qarşısının alınması kimi məsələlər əks olunub".
Onun sözlərinə görə, yeni qanun layihəsi Azərbaycanın Ümumdünya Ticarət Təşkilatına üzv olması üçün də vacibdir. Çünki təşkilat Azərbaycanda kənd təsərrüfatı məhsulları istehsalının beynəlxalq standartlara uyğunlaşdırılmasını tələb edir.
Komissiya qanun layihəsinin Parlamentdə müzakirəyə çıxarılması haqda qərar qəbul edib.
Parlamentin yaz sessiyası fevralın 1-də başlayır.
