Azərbaycan, Bakı, 07 fevral / Trend , müxbir S.İlhamqızı/"Bizim Azərbaycan" bloku Klassik Xalq Cəbhəsi Partiyasının sədrini yalan məlumat yaymaqda günahlandırır.
"KXCP sədri Mirmahmud Mirəlioğlu KİV-ə açıqlamasında 9 partiya tərəfindən yaradılmış Demokratik Seçki Mərkəzinin tərk edənlərin olmadığını, DSM-in 20-lər formatı tərəfindən yaradıldığını bildirir. Lakin "Bizim Azərbaycan" bloku DSM-də təmsil olunmur"-deyə "Bizim Azərbaycan" blokunun sədri Vüqar Bəyturan cümə axşamı Trend ə ünvanladığı bəyanatında bildirib.
Ötən ilin dekabrında 20 partiya əməkdaşlığa, bir-birlərinin əleyhinə təbliğat aparmamağa dair saziş imzalayıblar. "20-lər" formatı tərəfindən bu günlərdə Demokratik Seçki Mərkəzi adlı qurum yaradılıb.
Bəyturan bildirib ki, "Bizim Azərbaycan" blokuna daxil olan səkkiz partiya "20-lər" formatı çərçivəsində, 9 partiya ilə əməkdaşlıq dair həmin sazişi imzalanıb. Lakin həmin sazişdə hər hansı qurumun yaradılması ilə bağlı müddəa olmayıb. Bəyturanın sözlərinə görə, DSM sonradan yaradılıb və "Bizim Azərbaycan" blokuna daxil olan 8 partiya bu birliyə qoşulmayıb.
"Siyasi partiya rəhbərləri zorla Blokumuzu DSM-ə qatmaq istəyəndə və bu alınmadıqda eyhamlarla dolu bəyanatlar verəndə, elə təsəvvür yaranır ki, DSM-də hökmən 20 partiya olmalı idi və bu, kimlərinsə sifarişidir. Mən rəhbərlik etdiyim Blokun adından bir daha xəbərdarlıq edirəm ki, bizləri rahat buraxsınlar və biz də məcbur olmayaq ki, imzaladığımız sazişin tələblərini pozaraq, bəzi mətləbləri açıqlayaq"-deyə Bəyturan bildirib.
KXCP sədri Mirəlioğlu Trend ə açıqlamasında bildirib ki, "Bizim Azərbaycan" bloku Demokratik Seçki Mərkəzinin yaranmasında iştirak edib və blokun nümayəndəsi DSM-in toplantılarına da qatılıb.
"DSM-dən kim istəyir getsin, nəyi istəyir açıqlasın və bizi heç kim hədələməsin" -deyə Mirəlioğlu Bəyturanın açıqlamasına cavab olaraq bildirib.
KXCP sədrinin sözlərinə görə, DSM-in yaranmasında ən çox fəallıq göstərən də "Bizim Azərbaycan" bloku olub. O, əlavə edib ki, bu blokun adından Həsən Həsənov sonuncu iclasa qədər DSM-in toplantısında iştirak edib: "Ola bilər, gündəmə gəlmək üçün, ya da götürülən öhdəliklərə əməl etməmək üçün bu blok indi belə bəyanatlar verir. Əks təbliğat aparmaq istəyirlərsə, buyurub etsinlər, ölkədə sözə senzura yoxdur"-deyə KXCP sədri bildirib.