Azərbaycan, Bakı, 12 fevral / Trend , müxbir Q.Cəbiyev/ Hakim Yeni Azərbaycan Partiyası (YAP) Xocalı faciəsi ilə bağlı ölkə daxilində mitinq keçirilməsinin əleyhinədir. "Biz ölkə daxilində mitinq keçirib, bu faciə ilə bağlı həqiqətləri kimə çatdırmaq istəyirik? Əgər söhbət dünyaya çatıdrmaqdan gedirsə, biz bunu lazımi səviyyədə yerinə yetirmişik və bu işi davam etdirəcəyik" çərşənbə axşamı Trend ə YAP-ın icra katibinin müavini, millət vəkili Mübariz Qurbanlı bildirib.
Müsavat Partiyasının fevralın 11-də keçirilən Divanının toplantısında Xocalı soyqırımının ildönümü ilə əlaqədar müzakirə aparılıb. Fevralın 26-da Azadlıq Meydanında mitinq keçirilməsi üçün YAP da daxil olmaqla bütün partiyalara təklif göndərilməsi qərara alınıb.
1992-ci il fevralın 25-dən 26-na keçən gecə Ermənistan Silahlı Qüvvələri Xocalı rayonunda soyqırım həyata keçirib. Nəticədə 613 nəfər, o cümlədən 63 uşaq, 106 qadın və 70 qoca xüsusi amansızlıqla qətlə yetirilib.
Qurbanlı hesab edir ki, Xocalı faciəsini dünyaya çatdırmaq üçün belə mitinqlər ABŞ Senatı, Rusiya Duması, Fransa Senatı və başqa bu kimi ölkələrin müvafiq qurumlarının binası qarşısında keçirilməlidir. " Xaricdə Yaşayan Azərbaycanlılarla İş üzrə Dövlət Komitəsi bunu xaricdəki vətəndaşlarımızla birgə həyata keçirir. Ölkə daxilində hamı Xocalı faciəsinin soyqırım olduğunu, bunun erməni cəlladları tərəfindən edildiyini də bilir. Faciədən kimlərsə siyasi divident qazanmaq istəyir" Qurbanlı əlavə edib. Onun sözlərinə görə, faciə ilə bağlı Dəyirmi masalar keçirilməli, canlı müzakirələr aparılmalı və birgə bəyanatlar qəbul edilməlidir. Qurbanlı bildirib ki, YAP bu il də Xocalı faciəsi ilə bağlı müzakirələr təşkil edəcək və müvafiq addımlar atacaq.
Müəlliflə əlaqə saxlamaq üçün elektron ünvan - [email protected]
