...

Müxalifət partiyası Azərbaycan Demokratik Cümhuriyyətinin əhəmiyyətinin azaldılmasına etiraz edir

Siyasət Materials 15 Fevral 2008 15:38 (UTC +04:00)

Azərbaycan, Bakı, 15 yanvar / Trend , müxbir S.İlhamqızı/ Azərbaycan Demokratik Cümhuriyyətinin, onun liderlərinin Azərbaycan tarixindəki rolunu, əhəmiyyətini azaltmağa yönələn kampaniya yolverilməzdir. Trend in məlumatına görə, bu fikirləri Müsavat Partiyasının başqanı İsa Qəmbər cümə günü partiyanın təşkilatçılığı ilə keçirilən Demokratik Cümhuriyyətin 90 illiyinə həsr olunmuş toplantıda bildirib. Müsavat başqanı qeyd edib ki, Cümhuriyyətin qurucuları o dövrün böyük şəxsiyyətləri, fədakar insanları olublar. Ona görə də onların xəyanətkar adlandırılması çox yanlış kampaniyadır.

Millət vəkili, professor Kamil Həsənli qeyd edib ki, Cümhuriyyət Şərq aləmində islamdan müasirliyə keçid edən ilk dövlət olub. Bu dövlətin qurucuları arasında ideoloq, müstəqilliyi əsas hədəf kimi göstərən Məmmədəmin Rasulzadə olub. Həsənli əlavə edib ki, Rəsulzadə bütün Qafqazın müsəlmanları arasında Rusiya Məclisinə 2 yerdən - Cənubi Qafqaz və Türküstandan deputat seçilən yeganə siyasi xadimdir. Həsənli bildirib ki, 1920-ci ildə erməni gülləsindən həlak olmuş Cümhuriyyətin qurucularından biri Fətəlixan Xoyskinin xəyanətdə günahlandırılması yolverilməzdir.

Professor Məryəm Oruclu isə bildirib ki, qədim Azərbaycan şəhəri olan İrəvanın Demokratik Cümhuriyyətin Milli Şurasının qərarı ilə Ermənistana verilməsi o dövrün ağır şərtləri altında baş verib. Oruclunun fikrincə, hazırda Milli Şuranın bu qərarını cinayət səviyyəsinə qaldırmağa, bundan siyasi məqsədlər üçün istifadə etməyə çalışırlar. "Azərbaycanın 1918-ci ildə öz müstəqilliyini elan etməsinə hətta qardaş Türkiyədə birmənalı münasibət yox idi, qonşu İran isə ümumiyyətlə bu məsələyə istehza ilə yanaşırdı. Lakin Cümhuriyyəti quran siyasi xadimlər o dövrün bütün ağır şərtlərinə baxmayaraq, mümkün olmayan bir işi bacardılar - Bakını işğaldan azad edərək paytaxt elan etdilər, müstəqil dövlət qurdular" - deyə professor bildirib.

Xəbər lenti

Xəbər lenti