Azərbaycan, Bakı, 21 fevral / Trend , müxbir Q.Cəbiyev/ Azərbaycanın müxalif Demokrat Partiyasının (ADP) sədri Sərdar Cəlaloğlu müxalifətin aparıcı partiyalarının dəstəyindən imtina edib. "Cəmiyyətin gözünü mozol etmiş, yeni ideya və fikirlərin daşıyıcısı kimi çıxış etməyən, müəyyən mənada mənfi imici olan aparıcı müxalifətdəki bəzi qüvvələrin dəstəyi bizim ziyanımıza işləyə bilər" cümə axşamı Trend "a Cəlaloğlu bildirib.
Azərbaycanda prezident seçkiləri oktyabrda keçiriləcək. ADP Ali Şurası fevralın 16-da Cəlaloğlunun prezidentliyə namizədliyini irəli sürüb. Cəlaloğlu ötən həftə Trend "a prezident seçkilərində vahid namizədlə iştirak etmək üçün Müsavat Partiyası ilə əməkdaşlığın mümkünlüyünü bildirmişdi.
ADP sədri deyib ki, artıq "Azadlıq" blokundakı partiyalarla, Müsavatla seçkidə vahid namizədlə çıxış etməklə bağlı danışıqlar aparmaq absurddur. "Onların hər biri mövqeyini bildirib. "Azadlıq" bloku seçkilərə getmədiyini, Müsavat Partiyası isə namizədi ilə iştirak edəcəyini müəyyənləşdirib" Cəlaloğlu əlavə edib.
Müxalif müsavatçılar seçkilərdə partiyanın sədri İsa Qəmbərin namizədliyini irəli sürüb. "Azadlıq" blokuna üzv olan Xalq Cəbhəsi, Liberal, Vətəndaş və İnkişaf partiyaları seçkiləri boykot taktikasını tutub.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.