Azərbaycan, Bakı, 26 fevral / Trend , müxbir S.İlhamqızı/ Müxalifətçi Müsavat Partiyası builki prezident seçkisində iştirak etmək barədə qərarına yenidən baxa bilər.
"Prezident seçkisini boykot etməyimiz istisna deyil"-deyə Müsavat Partiyasının Məclis sədri Sülhəddin Əkbər çərşənbə axşamı Trend ə açıqlamasında bildirib.
Müsavat Partiyasının Məclisi bu ilin oktyabrında keçiriləcək prezident seçkisində partiyanın öz namizədi ilə iştirak etməsinə dair hələ ötən il qərar çıxarıb. Müsavat başqanı İsa Qəmbərin növbəti dəfə prezidentliyə namizəd olması barədə siyasi qərar verilib.
Partiyanın Məclis sədri bildirib ki, indiki mövcud vəziyyət - sərbəst toplaşmaq hüququnun, söz azadlığının məhdudlaşdırılması, müstəqil fikirli jurnalistlərin həbsi, müxalifətin KİV-lərə çıxışına, əhali ilə görüşlərinə şərait yaradılmaması müxalifəti prezident seçkisində iştirak edib-etməmək barədə ciddi düşünməyə vadar edir: "Ona görə də əgər hakimiyyət bu vəziyyəti davam etdirəcəksə, Müsavat Partiyasının prezident seçkisində iştirakdan imtina etməsi istisna deyil. Seçkiyə rəsmi start veriləndə partiya öz qərarına yenidən baxacaq"-deyə Əkbər bildirib.
Onun sözlərinə görə, Müsavat Partiyası hər bir seçkiyə yeni imkanlar kimi baxır və partiya hər kəsin seçkidə iştirakının tərəfdarıdır. Həmçinin partiya hesab edir ki, əvvəldən seçkini boykot qərarı verilməsi ziyanlıdır və cəmiyyəti daha da passivləşdirir. Ona görə də Müsavat Partiyası hələ ötən ildən seçkidə iştiraka dair qərar çıxarıb və cəmiyyətdə süstlüyün yaranmasına səbəb olmamaq üçün seçkinin boykot edilməsi ehtimalı barədə açıqlamalar verilmir.
Üç müxalifət partiyasını birləşdirən "Azadlıq" bloku isə bəyan edib ki, ölkədə siyasi vəziyyət dəyişməyəcəyi, minimum demokratik şərait yaradılmayacağı təqdirdə, prezident seçkisini aktiv boykot edəcək.
Əkbər bildirib ki, mövcud vəziyyətə münasibətdə Müsavat Partiyası ilə "Azadlıq" blokunun mövqeyi eynidir, lakin siyasi taktikaları fərqlidir: "Biz hesab edirik ki, seçkidə iştirak etməklə cəmiyyətdəki passivliyi aradan qaldırmaq, insanları fəallaşdırmaq lazımdır, "Azadlıq" bloku ilə düşünür ki, mövcud vəziyyəti dəyişmək üçün boykot yolunu seçməklə daha ciddi təsir göstərmək olar".
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı Qəmbər Azərbaycan Parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub, qazandığı səslərə görə səkkiz nəfər namizəd arasında ikinci olub. Müsavat Partiyası hazırda beş nəfər deputatla Parlamentdə təmsil olunur.