Azərbaycan, Bakı, 28 fevral / Trend , müxbir D.Xatınoğlu R.Hafizoğlu/Mahmud hmədinejadın İraqa səfəri ərəfəsində İraq rəsmilərinin bəzisinin Tehran əleyhinə bəyanat verməsi, onların iki ölkə arasında münasibətlərinin inkişafını istəmədiklərini göstərir. "İraqın bəzi rəsmiləri İran prezidentinin bu ölkəyə səfərinə mane olmaq istəyir"- Böyük Britaniyada fəaliyyət göstərən iranli politoloq Əlirza Nurizadə (Əlireza Nourizadeh) Trend a bildirib.
BBC-nin fevralın 28-də yaydığı məlumata əsasən, İraqın Milli Təhlükəsizlik naziri Məhəmməd Abdullah Şəhvani (Mohammad Abdollah Shahvani) jurnalistlərə bildirib ki, rəsmi Tehran İraq hakimiyyətinin terrorizmlə mübarizə planlarına əngəl törədir. "İran öz nufuzu altında olan İraqdakı qüvvələrinə əmr edib ki, hakimiyyətin terrorla mübarizə planını həyata keçirməyə mane olsunlar"-deyə, Şəhvani bildirib.
Bu bəyanat İran prezidenti Əhmədinejadın martın ikisində İraqa rəsmi səfəri ərəfəsində verilib.
Nurizadə cümə axşamı Londondan telefonla Trend a bildirib ki, İraqın təhlükəsizlik nazirinin Əhmədinejadın Bağdada səfəri ərəfəsində İran əleyhinə belə bir ittihamı, bu ölkənin İranın regionda nüfuzundan qorxduğunu göstərir. "İraq hakimiyyətinin bəzi yüksək rütbəli səxsləri Əhmədinejadin İraqa səfərinin rəsmi Tehranın İraqdakı mövqeyinin möhkəmlənməsi və inkişaf etməsi kimi dəyərləndirir. Bu isə onlara təhlükəlidir. İranın Inqilab Keşikçiləri Korpusu (Sepah) -ın Qüds şöbəsinin İraqda təxribatı, rəsmi Tehranın Bağdadın təhlükəsizliyinin bərpasına dair iddialarına ziddir"-deyə, Nurizadə bildirib.
Cümə axşamı İran Parlamenti Təhlükəsizlik Komissiyasının üzvü Rza Təlainik isə, bu barədə Trend -un suallarını cavablandırmaqdan imtina edib.
ABŞ dəfələrlə İranı İraqda təxribat aparmaqda ittiham edib. Bəzən İraqın sünni məzhəbli rəsmiləri də, Parlament və dövlət səviyyəsində, İrana qarşı eyni ittihamları yürüdürlər.
Rəsmi Tehran bu ittihamları rədd edərək, İraqda müsbət siyasət yürütdüyünü və bu ölkənin təhlükəsizliyinin bərpası istiqamətində addım atdığını bildirir.
İraq Xalq Cəbhəsi Partiyasının lideri Əllavi isə, hesab edir ki, "İranın İraqada müxtəlif maraqları var" fikri ABŞ-ın antiİran siyasətinə xidmət edir. ""İraqda ABŞ və İranın maraqları toqquşur" ifadəsi ABŞ iddialarından baqqa bir şey deyil"-deyə, İraqın sabiq Baş naziri İyad Əllavi cümə axşamı İraqdan elektron poçt vasitəsilə Trend - a bildirib.
O hesab edir ki, İran-İraq münasibətləri gələcək həllini kənar qüvvələrin müdaxiləsi olmadan,yaxın qonşuluq və qarşılıqlı mənafe prinsipləri ilə tapmalıdır.