Azərbaycan, Bakı, 05 mart/ Trend , müxbir İ.Əlizadə/ Qərb bölgəsində yerləşən Ağıstafa rayonunun ərazisində Sovet dövründən qalan partlamamış hərbi sürsatların zərərsizləşdirilməsinin üçüncü mərhələsinin başlaması ilə bağlı Azərbaycanla NATO arasında yeni müqavilə imzalanacaq. "Hazırda ANAMA-nın direktoru Nazim İsmayılov Brüsseldə NATO rəsmiləri ilə danışıqlar aparır" - deyə cümə axşamı Bakıda jurnalistlərə açıqlamasında Azərbaycanın NATO-dakı səfiri Kamil Xasıyev bildirib.
Ağıstafa rayonunun Saloğlu qəsəbəsi ərazisində keçmiş SSRİ Müdafiə Nazirliyinin hərbi bazası olub. Sonradan hərbi hissə dağılıb və orada olan hərbi sursatlar ətraf ərazilərə yayılıb. NATO ərazinin təmizlənməsi üçün iki dəfə maliyyə ayırıb.
Azərbaycan Ərazilərinin Minalardan Təmizlənməsi üzrə Milli Agentliyin (ANAMA) məlumatına görə, ötən il 714 min 720 kvadratmetr ərazi mina və partlamamış hərbi sursatlardan təmizlənib. Təmizlənmiş ərazilərdən 3062 partlamamış hərbi sursat (PHS) və mina aşkar edilərək zərərsizləşdirilib.
Ümumilikdə isə 58 milyon 697 min 367 kv.m ərazi təmizlənib və 28 837 mina və PHS tapılıb zərərsizləşdirilib. Agentlik tərəfindən təmizləmə əməliyyatları Tərtər, Ağdam, Füzuli, Goranboy, Xocavənd və Ağstafa rayonlarında aparılır.
2001-ci ildən indiyədək 91 hadisədə 56 nəfər həlak olub, 127 nəfər müxtəlif dərəcəli bədən xəsarəti alıb.
Səfir qeyd edib ki, danışıqlar başa çatandan sonra Azərbaycanla NATO arasında yeni müqavilənin nə vaxt imzalanacağı və onun şərtləri məlum olacaq.
