Azərbaycan, Bakı, 14 mart / Trend ", müxbir Q.Cəbiyev/ Hakim Yeni Azərbaycan Partiyası (YAP) ABŞ Dövlət Departamentinin hesabatında YAP-la bağlı yer alan fikirlərə etiraz edib. "ABŞ Dövlət Departamentinin insan haqlarının vəziyyətinə dair illik hesabatında hakim Yeni Azərbaycan Partiyası ilə bağlı yer alan fikirlər həqiqətdən uzaqdır" cümə günü Trend a YAP-ın icra katibinin müavini, deputat Mübariz Qurbanlı bildirib.
Dövlət Departamentinin hesabatında hakim partiyanın Azərbaycanda fəaliyyət göstərən təhsil ocaqlarında, eləcə də idarələrdə öz təşkilatlarını yaratması qeyd olunub.
Qurbanlı deyib ki, Departamentin sənədi qeyri-obyektivdir və həddən artıq siyasiləşməyə meyl var. Onun sözlərinə görə, heç bir təhsil ocağında və ya idarədə YAP-ın yerli təşkilatlarına rast gəlmək mümkün deyil. YAP yalnız ərazi vahidləri üzrə yerli təşkilatlara malikdir. Qurbanlı deyib ki, istənilən idarədə və ya təhsil ocağında çalışan şəxslərin siyasi mənsubiyyətinin olmasında qeyri-adi heç nə yoxdur.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 14 ildir hakim partiya olan YAP-ın indiki sədri prezident İlham Əliyevdir.
