Azərbaycan, Bakı, 14 mart / Trend , müxbir C.Babayeva/ Azərbaycan Yolu Siyasi Hərəkatı (AYSH) 18 müxalifət partiyasının keçən ilin dekabrında imzaladığı əməkdaşlıq sazişindən imzasını geri götürüb. Bu barədə cümə günü Trend -a sazişi imzalamış partiyalardan biri - "Azadlıq" partiyasının sədri Əhməd Oruc məlumat verib.
Keçən ilin dekabrında Azərbaycanın 18 müxalifət partiyası əməkdaşlıq barədə saziş imzalayıb. Sazişi "Bizim Azərbaycan" blokuna daxil olan səkkiz partiya, Klassik Xalq Cəbhəsi Partiyası (KXCP), Sosial-Demokrat, Vətəndaş Həmrəyliyi, Böyük Quruluş, Azadlıq, Milli-Demokrat, Ədalət, Ümid partiyaları və Azərbaycan Yolu Siyasi Hərəkatı imzalayıb. Partiyalar seçki dövründə əməkdaşlıq etmək və bir-birinin əleyhinə kampaniya aparmamaq barədə razılıq əldə ediblər. Yanvarın 30-da saziş imzalayan partiyaların doqquzu - Klassik Xalq Cəbhəsi Partiyası, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbaycan, Açıq Cəmiyyət, Təkamül və Yaşıllar partiyası Demokratik Seçki Mərkəzinin yaradılması barədə qərar qəbul edib.
Orucun sözlərinə görə, cümə günü Demokratik Seçki Mərkəzinin (DSM) iclasında AYSH tərəfindən Mərkəzə təqdim olunmuş müraciət müzakirə olunub.
"AYSH müraciətdə partiyalar arasında imzalanmış sazişin müddəalarının pozulduğunu əsas gətirərək, imzasını geri götürüb. Əsas kimi "Xalq Cəbhəsi" qəzetində dərc olunmuş "İlqar Qasımovu dəvət etməyə ehtiyac görmürəm" məqaləsi göstərilir və Hərəkatın bundan sonra 18 partiyanın təşkil edəcəyi heç bir tədbirə qoşulmayacağı bildirilib",- deyə Oruc məlumat verib.
Orucun fikrincə, AYSH-nin sazişdən imzasının geri götürməsi səbəbi əsassızdır.
"Hərəkat sazişdən imzasını geri götürmək üçün səbəb axtarırdı",- deyə Oruc qeyd edib.
Azərbaycan Yolu Siyasi Hərəkatı sədrinin təşkilati məsələlər üzrə müavini Şəmsəddin Rəhimlinin cümə günü Trend -a bildirdiyinə görə, sazişdən imzanın geri götürülməsi ilə bağlı Hərəkat adından, həqiqətən, müraciət təqdim olunub.
Onun sözlərinə görə, Hərəkat sazişdən imzasınını geri götürməsi ilə bağlı göstərdiyi səbəbi əsaslı hesab edir.
Əhməd Orucun AYSH-nin həmin sazişdən çıxmaq üçün səbəb axtardığı fikrini şərh edən Rəhimli bildirib ki, əgər hərəkat sazişdən imzasını geri götürmək üçün səbəb axtarışında olacaqdısa, əvvəlcədən bu sazişə imza atmazdı.
