Azərbaycan, Bakı, 30 mart / Trend ", müxbir Q.Cəbiyev/ Hakim Yeni Azərbaycan Partiyası (YAP) müxalifəti xarici qüvvələrlə işbirliyində ittiham edir. "Müxalifət xalqa yox, xarici qüvvələrə güvənmək iddiasında olduğunu büruzə verməkdədir" bazar günü Trend "a YAP icra katibinin müavini, millət vəkili Mübariz Qurbanlı bildirib.
Azərbaycanda prezident seçkisi oktyabrda keçiriləcək. Müxalifət liderləri açıqlamalarında bildirirlər ki, 2003-cü il prezident seçkisindən sonra Qərb dairələrinin hakimiyyətlə bağlı gözləntiləri özünü doğrultmayıb.
Qurbanlı deyib ki, seçkiyə gedən şəxs, siyasətçi xalqına güvənməlidir. "Qərb və ya Şimal dairələri bizim ölkənin siyasətini və xalqın əhval-ruhiyyəsini, seçimini müəyyən etmir. Xarici dovlətlərin öz marağı var" YAP rəsmisi əlavə edib.
Onun sözlərinə görə, biz kiməsə xoş gəlmək üçün demokratik yol seçməmişik. Hakimiyyətin taleyi Azərbaycan seçicisindən asılıdır.
Müxalif "Azadlıq" blokunun həmsədri, Vətəndaş və İnkişaf Partiyasının (VİP) sədri Əli Əliyev isə Trend "a hakim partiyanın müxalifəti xarici qüvvələrlə işbirliyində suçlamasını əsassız sayıb. Onun sözlərinə görə, bununla bağlı iqtidarın əlində hər hansı fakt varsa, məhkəmə qaydasında problemi həll edə bilər. Əliyev hesab edir ki, demokratiya dalğası Azərbaycanın sərhədinə gəlib çatdığından, iqtidar partiyası müxalifətə böhtan atır.
YAP 1992-ci ildə Naxçıvanda mərhum prezident Heydər Əliyev tərəfindən təsis olunub. Partiyanın hazırkı sədri prezident İlham Əliyevdir.
YAP prezident seçkisində Ilham Əliyevin namizədliyini irəli sürmək barədə qərar verəcəyini açıqlayıb.
"Azadlıq" blokunda üç müxalifət - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur.
