Azərbaycan, Bakı 18 aprel/ Trend , müxbir Q.Cəbiyev/Azərbaycanın müxalif Milli İstiqlal Partiyasının (AMİP) aprelin 20-nə təyin olunan növbədənkənar qurultayı qeyri-müəyyən vaxtadək təxirə düşüb. Bu barədə cümə günü Trend a AMİP sədrliyinə namizəd Əli Orucov məlumat verib.
AMİP qurultayın keçirilməsinə yer ayrılması üçün Bakı Şəhər İcra Hakimiyyətinə müraciət edib.
Meriyadan isə bildirilib ki, partiyanın qurultay keçirmək istədiyi yerlər - "Şəhriyar" Mədəniyyət Mərkəzi və Rəşid Behbudov adına Mahnı Teatrı Mədəniyyət və Turizm və Milli Təhlükəsizlik nazirliklərinin balansındadır. AMİP-in bu nazirliklərə etdiyi müraciətlərə də mənfi cavab verilib.
Orucov deyib ki, partiyanın öz imkanları hesabına qurultay keçirmək cəhdləri də alınmayıb. Belə ki, ayrı-ayrı özəl bina sahiblərinə edilən müraciətlərə mənfi cavab verilib.
AMİP-in sədr postu uğrunda üç nəfər namizədliyini irəli sürüb. Bunlardan biri Orucov, digərləri isə AMİP-in Nərimanov rayon təşkilatının sədri Ələddin Əsgərov və Goranboy rayon təşkilatının sədri Fəqan Məhərrəmlidir.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
