Azərbaycan, Bakı, 24 aprel / Trend , müxbir E.Hüseynli/ Azərbaycanın müxalif Müsavat Partiyası prezident seçkisi öncəsi "kölgə kabineti"ni formalaşdıracaq. Bu barədə cümə axşamı Trend -a partiyanın İcra Aparatının rəhbəri Arif Hacılı bildirib.
Azərbaycanda prezident seçkisi oktyabrda keçiriləcək. Müsavat Partiyasının Məclisində partiyanın sədri İsa Qəmbərin prezidentliyə namizədliyi irəli sürülüb.
Seçkidə namizədi ilə iştirak edən Azərbaycanın digər müxalif Demokrat Partiyası (ADP) da "kölgə kabineti"ni formalaşdırdığını və mayın sonlarında onların üzvlərinin adlarını açıqlayacağını bəyan edib.
Hacılı deyib ki, partiyanın namizədi prezident seçkisində qalib gəlsə, komandasını indiki iqtidar və müxalifət üzvlərindən formalaşdıracaq. Onun sözlərinə görə, Müsavat Partiyası hakimiyyətə gəldiyi halda, indiki iqtidarda və müxalifətdə olan bacarıqlı, vətənpərvər kadrlardan istifadə edəcək. "Biz komandamızı insanların siyasi əqidəsinə görə formalaşdırmayacağıq. İndiki iqtidarın vətənpərvər kadrlarından istifadə ediləcək" Hacılı əlavə edib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı Qəmbər Azərbaycan Parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya dörd deputatla Parlamentdə təmsil olunur.
Məqalə müəllifi ilə əlaqə ünvanı: [email protected]