Azərbaycan, Bakı, 25 aprel / Trend , müxbir İ.Əlizadə/ Azərbaycan Parlamenti Əli Bayramlı şəhərinin və Xanlar rayonunun adlarının dəyişdirilməsi haqqında qanun layihəsini qəbul edib. Milli Məclisin cümə günü keçirilən iclasında Əli Bayramlı şəhərinin və Xanlar rayonunun adlarının dəyişdirilməsi məsələsi müzakirə olunub.
Parlamentin Regional məsələlər daimi komissiyasının üzvü Rüstəm Xəlilov bildirib ki, Əli Bayramlı şəhərinin sakinləri, şəhər İcra Hakimiyyəti və bələdiyyə Milli Məclis yanında Toponomiya Komissiyasına müraciət ediblər və Əli Bayramlının adının dəyişdirilərək Şirvan adlandırılması xahiş olunub.
"Xanlar rayonundan da Toponomiya Komissiyasına müraciət daxil olub. Müraciətdə rayonun adının dəyişdirilərək Göy Göl adlandırılması xahiş olunur", - deyə Xəlilov əlavə edib.
Deputatlar Sabir Rüstəmxanlı və İqbal Ağazadə Əli Bayramlı şəhərinin Şirvan adlandırılmasına etirazlarını bildiriblər. Deputatlar hesab edirlər ki, Şirvan böyük bir çoğrafi-tarixi ərazini əhatə edir. Ona görə də Şirvanın adını bir şəhərlə məhdudlaşdırmaq olmaz.
Ağazadə və Rüstəmxanlı Göy Göl gölünün adının bir rayona verilməsinə də etiraz ediblər.
Parlamentin sədri Oqtay Əsədov bu fikirlərlə razılaşmayıb, qeyd edib ki, Şirvan adının bir şəhərə verilməsi ona heç bir xələl gətirmir.
"Göy Göl Azərbaycanın incisidir. Lakin onu dünyada heç kim tanımır. Göy Gölün adı rayona veriləndən sonra məşhurlaşacaq və həmin bölgəyə turist axını artacaq", - deyə spiker əlavə edib.
Parlament səs çoxluğu ilə Əli Bayramlı şəhərinin Şirvan və Xanlar rayonunun isə Göy Göl adlandırılması haqqında qanun layihəsini qəbul edib.