Mayın 9-da prezident İlham Əliyev Zığ dairəsi-Heydər Əliyev adına beynəlxalq hava limanı avtomobil yolunun, habelə Binə və Zirə qəsəbələrində bir sıra obyektlərin açılışında iştirak edib.
İlham Əliyev
tapşırığı yüksək keyfiyyətlə
yerinə yetirdiklərinə görə
inşaatçılara öz minnətdarlığını
bildirib.
Açılış mərasimindən xatirə olaraq prezident İlham Əliyevə hədiyyə təqdim edilib.
Dövlət
başçısının xüsusi
tapşırığı əsasında 2007-ci il noyabrın
10-da tikintisinə başlanmış Zığ
dairəsi-Heydər Əliyev adına beynəlxalq hava
limanı avtomobil yolunun sifarişçisi Nəqliyyat Nazirliyi,
icraçısı isə "Akkord" Şirkətlər Qrupudur.
Ən son texnologiyanın tətbiqi ilə Avropa standartlarına
uyğun çəkilmiş 17 kilometrlik yol 6
hərəkət zolaqlıdır. Yolun ümumi eni 29,5 metr,
hərəkət zolaqlarının hər birinin eni 3,75
metrdir.
Zığ dairəsi-Heydər Əliyev adına beynəlxalq hava limanı avtomobil yolunun çəkilişi ilə eyni vaxtda 12 kilometrlik Azadlıq meydanı-Zığ dairəsi avtomobil yolunun C.Naxçıvanski adına hərbi liseydən Zığ dairəsinədək olan son 3 kilometrlik hissəsi də 8 zolaqlı hərəkət üçün beton örtüklə yenidən qurulub.