Azərbaycan, Bakı, 12 may / Trend , müxbir E.Babayev/ Seçki Məcəlləsinə əlavə və dəyişikliklərlə bağlı iki layihə hazırlanıb. Bu barədə bazar ertəsi Trend ə millət vəkili Zahid Oruc məlumat verib.
Məcəlləyə əlavə və dəyişikliklərlə bağlı layihənin birini Milli Məclisin Hüquq siyasəti və dövlət quruculuğu komissiyası, digəri isə, Azərbaycan hökuməti ilə Venesiya Komissiyasının birgə hazırladığı sənəddir.
Oruc bildirib ki, Avropa Şurasının Venesiya Komissiyası ilə birgə hazırlanan və prezident İlham Əliyevin imzası ilə Milli Məclisə daxil olan layihədə seçki kampaniyasının 120 gündən 60 günə endirilməsi yer almayıb. "Bu məsələ Milli Məclisin Hüquq siyasəti və dövlət quruculuğu daimi komissiyasının hazırladığı layihədə əksini tapıb. Layihədə 11 maddəyə dəyişiklik nəzərdə tutulub" - deyə o qeyd edib. Oruc əlavə edib ki, Milli Məclis komissiyasının təklifləri sırasında, həmçinin, seçki təşviqatına ayrılan müddətin 60 gündən 21 günə endirilməsi də yer alıb. "Hər iki layihə Milli Məclis tərəfindən müzakirə olunacaq"- deyə o vurğulayıb.
Seçki Məcəlləsinin 86 maddəsinə dəyişiklik olunması nəzərdə tutulur. Prezidentin imzası ilə göndərilən layihədə namizədlər üçün Seçki Fondunun artırılması, səsvermə prosedurunun sadələşdirilməsi, dövlət televiziyasında və rəsmi qəzetlərdə seçki təbliğatının aparılmasına qadağa qoyulması yer alıb.
Azərbaycanda prezident seçkisi oktyabrın 15-də keçiriləcək.
Məqalə müəllifi ilə əlaqə ünvanı: [email protected]
