Azərbaycan, Bakı, 13 may / Trend , müxbir E.Babayev/ Müxalif Vəhdət Partiyası bəyan edib ki, bütün müxalifət partiyaları birləşsə belə, Azərbaycanda keçiriləcək prezident seçkisini boykot etmək imkanında olmayacaq. "Azərbaycanın bütün müxalifət partiyaları birləşsə belə, prezident seçkisini boykot edə bilməyəcək", çərşənbə axşamı Trend -a partiyanın sədri Tahir Kərimli deyib.
Seçki Məcəlləsinə əlavə və dəyişikləri nəzərdə tutan layihə yaxın vaxtlarda Parlamentdə müzakirə olunacaq. Məcəllədə müxalifətin seçki komissiyalarının tərkibinin dəyişdirilməsi ilə bağlı təklifi öz əksini tapmayıb. Bundan başqa, dövlət televiziyasında və rəsmi qəzetlərdə namizədlərə pulsuz efir vaxtının ayrılması yeni layihəyə əsasən qadağan olunub. Əlavə və dəyişikliklərdən narazı qalan müxalifət partiyaları arasında boykota meyillilik artıb.
Azərbaycanda prezident seçkisi oktyabrın 15-də keçiriləcək.
Kərimli deyib ki, Məcəlləyə təklif olunan dəyişikliklərin əksəriyyəti müsbət xarakter daşıyır. "Seçki komissiyalarının paritet əsasda formalaşdırılmasına gəlincə, müxalifətin bunu tələb etməyə haqqı çatmır. Çünki iqtidar müxalifətdən qat-qat güclüdür. Belə bir şəraitdə paritet məsələsini gündəmə gətirmək ədalətsizlikdir"- deyən Kərimlinin fikrincə, gələcəkdə yalnız seçki komissiyalarını siyasi asıllıqdan qurtarmaq və mütəxəssislərdən formalaşdırmaq məsələsinə baxılması daha düzgün yol ola bilər.
Azərbaycan Ali Məhkəməsinin keçmiş sədri, sabiq millət vəkili Kərimlinin rəhbərlik etdiyi Vəhdət Partiyası 2006-cü ilə qədər müxalifət mövqeyində olub. Partiya hazırda iqtidarın siyasi kursunu dəstəkləyir.
Məqalə müəllifi ilə əlaqə ünvanı: [email protected]
