Rusiya, Moskva, 14 may/ Trend , müxbir R.Ağayev/ Moskvada "Qafqaz Albaniyası və ləzgi xalqları: tarixi-mədəni irs və müasirlik" beynəlxalq simpoziumun keçirilməsində heç bir siyasi səbəb və separatçılıq yoxdur. Rusiyanın Federal Ləzgi Milli-Mədəni Muxtariyyətinin (FLMMM) prezidenti Arif Kərimov eksklüziv olaraq Trend -a bildirib.
"Mən Azərbaycan xalqını həmişə qardaş xalq, Azərbaycanı isə, öz Vətənim hesab etmişəm və hesab edirəm. Belə tədbirlərin keçirilməsində separatçılığa heç bir işarə yoxdur", - Kərimov çərşənbə günü bildirib.
Mayın 14-də Moskvada, RF prezidenti yanında Rusiya Dövlət Xidməti Akademiyasının binasında açılan simpoziumda ləzgilərin Azərbaycana qarşı ərazi iddialarının səsləndirildiyi ədəbiyyat yayılır. FLMMM və RF Dövlət Dumasının milli məsələlər üzrə Komitəsi tərəfindən dərc edilən "Ləzgi və ləzgidilli xalqların müasir problemləri" kitabçasında ləzgi xalqının Milli Şurasının sədri, professor Q.Əbdürrəhimovun "ötən əsrin 20-ci illərində ləzgi xaqlının zorla parçalanması və ləzgi xalqına qarşı etnosidi tanımağa" səsləyən çağırışı öz əksini tapıb. Kitabçada, "RF və Azərbaycan Respublikası arasında sərhədlərin delimitasiyasının qanunsuzluğu, sərhədlərə yenidən baxılması və Ləzgistanın yaradılması məqsədilə Azərbaycanın şimal rayonlarının Dağıstana birləşdirilməsinin zəruriliyi" vurğulanır.
Simpozium çərçivəsində Dağıstan Respublikası Pedaqogika ETİ-nin əməkdaşı Qurban Xalikoviçin 2007-ci ildə Mahaçqalada nəşr olunmuş "Ləzgistan dünya xəritəsində" kitabı 300 rubla satılır. Bu kitabda Azərbaycan və azərbaycanlıların tarixi-mədəni irsi tamamilə ləzgiləşdirilib, azərbaycanlılar və Azərbaycan tarixi kontekstdə dövlət kimi, ümumiyyətlə, xatırlanmayıb.
" Separatçılıq prinsip etibarilə düşünülbsə də, kifayət qədər qapalı formada həyata keçirilir. Buna görə, narahatçılığa heç bir səbəb görmürəm", - Kərimov bildirib və qeyd edib ki, onun separatçı fəaliyyəti "Moskvanın izi, Kremlin sifarişi və s." haqqında Azərbaycan KİV-də dərc edilən materiallar həqiqətə uyğun deyil.
Kərimov, həmçinin, bildirib ki, Azərbaycandan dəvət edilən beş qafqazşünas alim və şəxsən Azərbaycanın RF-dəki səfiri Polad Bülbüloğlu Moskvada keçirilən tədbirə gəlməyiblər. "Axı söhbət Qafqaz Albaniyası, onun dövlətçiliyi, 1500 il əvvəl baş vermiş hadisələrdən gedir. Həmin ərazidə yaşamış bütün xalqlar - ləzgilər, azərbaycanlılar, talışlar və başqalarının öz tarixi, mədəniyyətlərinin elmi tədqiqinə eyni mənəvi haqları var" - FLMMM prezidenti hesab edir.
"Belə əsaslandırılmayan tənqiddənsə, Azərbaycanın elm xadimlərinin iştirakı daha məqsədəuyğun olardı. Mən hətta salamlama çıxışımda qeyd etdim ki, bu beynəxalq simpozium son dərəcə elmi xarakter daşıyır və buna siyasi çalar vermək istəyənlər çıxış etmək imkanından məhrum olacaqlar"- FLMMM prezidenti Arif Kərimov bildirib.
Onun sözlərinə görə, simpoziumun belə ad altında keçirilməsi əvvəlcədən bir vəzifə kimi qarşıya qoyulmayıb, sadəcə, ləzgi xalqının qədim tarixi və mədəniyyətinə həsr olunmuş elmi konfransın keçirilməsi planlaşdırılıb. Lakin görkəmli Rusiya, o cümlədən Dağıstan alimlərinin daxil olduqları təşkilat komitəsinin üzvləri simpoziumu məhz hazırki ad altında keçirməyi təklif ediblər. Belə ki, Türkdilli, fin-uqor və başqa xalqlar kimi, ləzgidilli xalqlar mövcuddur", - Kərimov əlavə edib.
