Azərbaycan, Bakı, 15 may / " ", müxbir M.Əliyev/ ABŞ-ın Milli Demokratiya İnstitutu (MDİ) Azərbaycan məhkəməsinin yerli Seçki Monitorinqi Mərkəzinin (SMM) qeydiyyatının dayandırılmasına dair qərarı ilə bağlı narahatlığını bildirib.
"Məhkəmənin qərarı demokratik seçkilər prosesinə - vətəndaşların seçkiləri izləmək hüququna zərbədir", - deyə MDİ-nin cümə axşamı yayılan bəyanatında bildirilir.
SMM təsis sənədlərini Ədliyyə Nazirliyinə 2006-cı il martın 14-də təqdim edib. Nazirliyin müvafiq orqanları SMM-yə dövlət qeydiyyatının verilməsi ilə bağlı beş dəfə rədd cavabı verib. Cari ilin fevral ayında Mərkəz nəhayət ki, qeydiyyatdan keçib. Təşkilat Azərbaycanda altı seçkinin monitorinqini aparıb və 4000 müşahidəçi üçün treninqlər keçirib.
Bakının Xətai rayon məhkəməsi çərşənbə günü Seçki Monitorinq Mərkəzinin qeydiyyatını ləğv edib. Məhkəmə Ədliyyə Nazirliyinin Qeydiyyat və Notariat Baş İdarəsinin SMM-in qeydiyyatının etibarsız sayılması və ləğv edilməsi barədə iddiasını təmin edib.
Nazirlik SMM-in qeydiyyatının ləğvi barədə iddiasını təşkilatın təsis sənədlərində təsisçilər barəsindəki məlumatların qeyri-müəyyən olması, təşkilatın hüquqi ünvanının dəyişdirilməsi barədə məlumatın nazirliyə bildirilməməsi, SMM-in Azərbaycanın 8 şəhərində yerləşən nümayəndəlikləri barədə məlumatların dövlət reyestrinə daxil edilməməsi ilə əsaslandırıb.
"Yerli seçki monitorinqlərinə qarşı istənilən fəaliyyət seçkilər prosesinin təkmilləşdirilməsi mövzusu ilə bağlı narahatlığı artırır. Biz ümid edirik ki, ədalət qalib gələcək və Seçki Monitorinq Mərkəzi Azərbaycanda 2008-ci ildə keçiriləcək prezident seçkiləri üzrə monitorinqə buraxılacaq", -deyə sənəddə bildirilir.
Təşkilatın həmtəsisçisi Anar Məmmədli qeyd edib ki, məhkəmənin qərarı ilə bağlı yuxarı instansiya məhkəmələrinə appelyasiya şikayəti vermək niyyətindədir.
Müəlliflə əlaqə saxlamaq üçün elektron ünvan : trend
