Azərbaycan, Bakı, 26 may/ Trend , müxbir E.Babayev/ Azərbaycanın Mərkəzi Seçki Komissiyası (MSK) bildirib ki, ölkədə keçiriləcək bələdiyyə və parlament seçkilərində elektron səsvermə ilə bağlı pilot layihə həyata keçiriləcək. "Elektron səsvermə ilə əlaqədar hazırda xarici ölkələrin təcrübəsi öyrənilir və texniki imkanlar araşdırılır", bazar ertəsi Trend -a MSK-nın beynəlxalq əlaqələr şöbəsinin müdiri Rövzət Qasımov bildirib.
Trend -un arayışı: Elektron səsvermə İsveçrə, Rusiya, İngiltərə və digər ölkələrdə pilot layihə şəklində həyata keçirilir. Estoniyada isə elektron səsvermə demək olar ki, tam tətbiq olunur. Azərbaycan Avropa Şurasının Nazirlər Komitəsinin elektron səsvermə üzrə yaradılan Alt Komtəsinin üzvüdür. Alt Komitədə 2006-2007-ci illərdə elektron səsvermənin tətbiqi ilə bağlı yekun sənəd qəbul olunub. Elektron səsvermə internet vasitəsilə həyata keçirilir. Səsvermə məntəqələrinə gedə bilməyən seçicilər elektron səsvermədən istifadə edir. Eyni zamanda, məntəqələrin özündə də elektron səsvermə imkanı yaradılır.
Azərbaycanda bələdiyyə seçkisi 2009-cu, parlamaent seçkisi isə 2010-cu ildə keçiriləcək.
Qasımov deyib ki, elektron səsvermənin oktyabrın 15-də keçiriləcək prezident seçkisində də tətbiqi planlaşdırılsa da, müəyyən texniki problemlərin həll olunmaması səbəbindən elektron səsvermədən istifadə builki seçkidə baş tutmayacaq.
Məqalə müəllifi ilə əlaqə ünvanı: [email protected]
