Azərbaycan, Bakı, 28 may/ Trend , müxbir E.Babayev/ Müxalif Azərbaycan Demokrat Partiyası (ADP) hakimiyyətə gələcəyi təqdirdə iqtidarın formalaşmasını təkbaşına həyata keçirmək niyyətində deyil. "Artıq belə qərara gəlmişəm ki, ADP hakimiyyətə gəlsə, Müsavat Partiyasına belə bir təklif göndərim", çərşənbə günü Trend -a ADP sədri Sərdar Cəlaloğlu bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot etmək niyyətindədir.
Cəlaloğlu vurğulayıb ki, bunlar hamısı hələlik nəzəri məsələlərdir. "Çünki seçkiyə hələ start verilməyib və mənim namizədliyim rəsmiləşməyib. Seçkinin nəticələrinin necə olacağı da bəlli deyil. Buna baxmayaraq, mənim planlarım içərisində Müsavata koalisiya təklifi göndəmək də var" - deyə o vurğulayıb.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
Müsavat Partiyasının Mərkəzi İcra Aparatının rəhbəri Arif Hacılı isə çərşənbə günü Trend -a bildirib ki, Cəlaloğlunun təklifinə münasibətləri müsbətdir. "Bu, maraqlı təklifdir və biz buna müsbət yanaşırıq. Təki ADP hakimiyyətə gəlsin, onda biz konkret olaraq şərtlərimizi bildirərik" - deyə Hacılı vurğulayıb.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
