Azərbaycan, Bakı, 29 may/ Trend , müxbir İ.Əlizadə/ Xəzər dənizində hasil olunan qazı Avropa bazarlarına çıxaracaq NABUCCO layihəsi reallaşarsa, NATO kəmərin təhlükəsizliyini təmin etməyə hazırdır. "Layihənin istiqamətləri müəyyənləşsə, maliyyə ayrılsa, yəni, layihənin reallaşması konkretləşsə, NATO kəmərin təhlükəsizliyi ilə bağlı hər bir sahədə iş görməyə hazırdır", - deyə cümə axşamı jurnalistlərə açıqlamasında Azərbaycan parlamentinin vitse-spikeri, NATO Parlament Assambleyasındakı nümayəndə heyətinin rəhbəri Ziyafət Əsgərov bildirib.
NATO Parlament Assambleyasının bir necə gün əvvəl başa çatan yaz sessiyasında Avroatlantik məkanın enerji təhlükəsizliyinin təmin olunması məsələsi müzakirə olunub. Eyni zamanda, sessiyada NABUCCO layihəsinin Azərbaycandan keçməsi ilə bağlı məruzə dinlənilib.
"NATO ekspertlərinin də əsas fikri ondan ibarətdir ki, NABUCCO layihəsi reallaşmalıdır", -deyə Əsgərov əlavə edib.
Onun sözlərinə görə, layihənin reallaşması üçün Qərb, Avropa dövlətləri çox çalışırlar. Karbohidrogen ehtiyatlarının Avroatlantik məkana təhlükəsiz surətdə çatdırılması üçün NATO PA-da bundan sonra da belə müzakirələrin davam etdirilməsi gözlənilir.
"NATO PA Avropanın enerji təhlükəsizliyinin təmin olunmasında Azərbaycanın rolunu çox yüksək qiymətləndirir", -deyə Əsgərov əlavə edib.
Azərbaycan NATO PA-nın assosiativ üzvüdür.
Məqalə müəllifi ilə əlaqə ünvanı: [email protected]
