Azərbaycan, Bakı, 03 iyun / Trend , müxbir D.Xatınoğlu R.Hafizoğlu/ Sünni və şiə məzhəblərinin tərəfdarları olam müsəlmanlar arasında böyük konfliktlərlə nəticələnən fikir ayrılıqlarının aradan qaldırılması üçün, onların arasında dialoqun qurulması vacibdir. "Məzhəblər- arası dialoq konfransları bütün müsəlman ölkələrində keçirilməlidir"- deyə, rusiyalı dinşünas alim Heydər Camal Trend -a bildirib.
Iyunun 3-də Səudiyyə Ərəbistanında İslam Məzhəbləri Arası Dialoq Konfransı keçirilir. BBC-nin məlumatına əsasən, bu konfrans sünni və şiə müsəlmanları arasında konfliktlərin həll olunmasını özünə məqsəd qoyub. Ciddə şəhərində keçirilən bu konfransda 500 nəfərə yaxın dinşünas alim iştirak edib.
"Məzhəblərarası dialoq yalnız Səudiyyə Ərəbistanında deyil, eyni zamanda İranda da keçirilməlidir. Bu gün islam dünyası üçün məzəhəblər arası dialoqdan daha önəmli və vacib bir məsələ yoxdur"-deyə, Rusiya İslam Komitəsinin sədri Heydər Camal çərşənbə axşamı telefonla Moskvadan bildirib. Onun sözlərinə görə, müsəlmanlar , ilk növbədə, məzhəblər arası ixtilafları ortadan qaldırmalıdırlar.
"İslam dünyası xarici düşmənlərə qarşı mübarizə aparmaq üçün məzhəbarası fərqli düşüncə və görüşləri bir yana qoyaraq, vəhdət prinsiplər altında birləşməlidirlər. Əks halda, islam uduzmaq təhlükəsi ilə üz-üzədir " - deyə Camal hesab edir : "Təbii ki, məzhəblər arası dialoqa həsr olunmuş konfranslar digər müsəlman ölkələrində də keçirilməlidir. Belə konfransların əsəs müsbət cəhətlərindən biri də məzhəblərin bir - birini daha yaxından tanıması və əks məzhəb haqqında formalaşmış səhv fikirlərin düzəlməsi ilə nəticələnməsidir".
Digər islamşünas mütəfəkkir Məhəmməd Zahid Gül isə, hesab edir ki, məzhəblər arası diaoloq altında keçirilən konfrans müsbət nəticələnməyəcək.
"Təəssüf hissi ilə qeyd edirəm ki, belə konfransların nəticəsi həmişə kağız üzərində qalır" - deyə, Zahid çərşənbə axşamı Əmmandan telefonla Trend -a bildirib.
Ekspertin fikrincə, tərəflər özləri də konfransın faydasız və nəticəsiz qalacağına əmindirlər. "Bu gün İslam məzhəbləri arasında olan kiçik ixtilaflar siyasiləşib və bu məsələlərin məzhəblər arası konfransda həll edilməsi qeyri - mümkündür" - deyə o bildirirb.
Zahid hesab edir ki, konfransda hər hansı bir nəticə əldə olunsa da, konfrans iştirakçıları bunu həyata keçirməyəcəklər. "Belə konfranslar keçirməkdənsə, müsəlman əhalinin dini maarifləndirilməsi daha faydalıdır"-deyə o əlavə edib.
Keçən ay ərzində bəzi müsəlman ölkələrində, xüsusilə də, Livan və İraqda sünni və şiə qrupları arasında qanlı konfliktlər yaranıb. Mayın sonunda, Livandakı qrupların qarşıdurması Qətərin vasitəçiliyi ilə bir az səngiyib. Lakin İraqdakı vəziyyət keçmişdəki kimi davam edir.
Məqalənin müəllifi ilə [email protected] ünvanı ilə əlaqə saxlaya bilərsiniz.
