Azərbaycan, Bakı, 09 iyun/ Trend , müxbir E.Babayev/ Müxalif Azərbaycan Milli İstiqlal Partiyasının (AMİP) lideri Etibar Məmmədov prezident seçkisində iştirakını istisna etmir. "Əgər partiyanın bununla bağlı qərarı olsa və namizədliyim irəli sürülsə, mən bu qərara tabe olacağam", bazar ertəsi Trend -a Məmmədov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəöhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Məmmədov özünün seçkidə iştirakla bağlı mövqeyini açıqlamaq istəməyib və bu mövqeyin partiyanın qurultayında veriləcək qərardan asılı olacağını bildirməklə kifayətlənib.
AMİP-in sədr müavini Əli Orucov isə bazar ertəsi Trend -a bildirib ki, Məmmədovun namizəd olması həm də onun özündən asılı olan məsələdir. "Partiya üzvlərinin rəyinə gəldikdə isə, əksəriyyət hesab edir ki, Məmmədov seçkidə iştirak etsin. Partiyanın lideri seçkiyə qoşularsa, ciddi nəticə əldə edə bilər", - deyə Orucov qeyd edib.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
