Azərbaycan, Bakı, 12 iyun/ Trend , müxbir E.Babayev/ Azərbaycanın iqtidaryönlü Ana Vətən Partiyasının (AVP) növbəti qurultayının vaxtı müəyyənləşib. "Partiyamızın qurultayı iyun ayının 17-də keçiriləcək", cümə axşamı Trend -a AVP-nin sədr müavini, millət vəkili Zahid Oruc məlumat verib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Oruc bildirib ki, AVP-nin qurultayında partiyanın prezidentliyə namizədi irəli sürüləcək. "Partiya üzvlərinin yekdil rəyi hazrıki dövlət başçısı İlham Əliyevin namizədliyinin irəli sürülməsidir", - deyən Oruc partiyanın qurultayında təşkilati məsələlərə də baxılacağını bildirib.
AVP Fəzail Ağamalı tərəfindən formalaşıb. Partiyaya indiyə qədər Ağamalı sədrlik edib. AVP hakimiyyətin siyasətini müdafiə edir və 2003-cü il prezident seçkilərində İlham Əliyevin namizədliyini irəli sürüb.
Məqalə müəllifi ilə əlaqə ünvanı: [email protected]
