Azərbaycan, Bakı, 13 iyun/ Trend , müxbir E.Babayev/ Azərbaycan politoloqları hesab edirlər ki, ölkə siyasətində yeni qüvvələrin meydana çıxması prosesi qaçılmazdır. "Yeni vətənpərvər, inellektual, sağlam düşüncəli siyasi qüvvələrin meydana çıxmasına ehtiyac var və yaxın zamanlarda xalq həmin qüvvələrə dəstək verəcək", cümə günü Trend -a politoloq Zərdüşt Əlizadə deyib.
Trend -un arayışı: Azərbaycanda yeni siyasi qüvvələrin meydana gəlməsi məsələsi 2003-cü ildən sonra meydana çıxıb. Əksər müxalifət liderlərinin 15 ildən artıqdır siyasi arenada olmalarına baxmayaraq, seçkilərdə heç bir nəticə əldə edə bilməmələri onların yeniləri ilə əvəzlənməsi mövzusunu aktual edib. Ötən 5 ilə yaxın müddət ərzində bir sıra yeni siyasi partiyalar yaransa da, onlar ənənəvi müxalifətdən üstün mövqeyə malik ola bilməyiblər.
Əlizadə bildirib ki, Azərbaycanda yeni siyasi qüvvələr fəaliyyətdədir və onların önə çıxa bilməmələrinin səbəbi ölkədə siyasi fəaliyyət göstərmək üçün imkanların yetərli olmaması ilə bağlıdır. "Amma gec-tez xalq onların çağırışlarına cavab verəcək. Azərbaycanda ənənəvi müxalifət artıq sıradan çıxıb və onların fəaliyyəti sıfır səviyyəsindədir. Ənənəvi müxalifətin çıxdaş olunması qaçılmaz olacaq. Onları siyasi meyitlərdir və bu meyitləri basdırmaq lazımdır", - deyə Əlizadə vurğulayıb.
Politoloq Rasim Musabəyov isə cümə günü Trend -a bildirib ki, Azərbaycanda yeni siyasi qüvvələrin yaranmasında heç bir problem yoxdur. Onun sözlərinə görə, bu proses süni şəkildə baş verə bilməz. Əgər kimlərsə siyasi arenada onlara ehtiyac olduğunu düşünürsə, meydana çıxıb fəaliyyətə başlaya bilər. "Azərbaycanda yeni partiyalar yaranır və bu proses heç də ləng getmir. Amma onların real qüvvələrə çevrilməsi başqa məsələdir və heç kim onları süni şəkildə qüvvəyə çevirə bilməz", - deyə Musabəyov vurğulayıb.
Məqalə müəllifi ilə əlaqə ünvanı: [email protected]
