Azərbaycan, Bakı, 13 iyun / Trend , müxbir D.Xatınoğlu/ Türk əsilli milli fəal Fərhad Möhsüni İran həbsxanasındaona verilən işgəncələrdən keçinib. Bu haqda Trend -a İranda Siyasi məhbusların müdafiəsi üzrə Böhran Komitəsinin mətbuat katibi Əmir Hüseyn Müvəhhidi bildirib.
Təbrizdə fəaliyyət göstərən İnsan Haqlarını müdafiə üzrə Tələbə Hərəkatı Təşkilatının Trend -a verdiyi məlumata əsasən, Fərhad Möhsüni ölkənin Təhlükəsizlik Xidməti İdarəsində (Ettelaat) işgəncə altında bu həftə vəfat edib. Cümə günü elektron poçtla verilən məlumatda deyiliir ki, təbrizli milli fəalın dəfn mərasimində xalqın iştirakına qadağa qoyulub, onun ailəsinə xarici informasiya agentlikləri ilə əlaqə yaratmamaq barədə xəbərdarlıq edilib.
" Mərhum təhlükəsizlik qüvvələrinin tam nəzarəti altında, kənar şəxslərin iştirakı olmadan dəfn edilib "-deyə, Müvəhhidi cümə günü telefonla Təbrizdən bildirib.
"Hazırda onlarla türk əsilli İran vətəndaşı milli fəaliyyətinə görə həbsdədir və biz fəalların harada, hansı şəraitdə və necə saxlanılması barədə məlumat əldə edə bilmirik" - deyə Müvəhhidi qeyd edib. Onun sözlərinə görə, son ayda müxtəlif bəhanələrlə həbs olunmuş milli hərəkat fəallarının sayını müəyyənləşdirmək də mümkün olmayıb. Hüquq müdafiəçisinin dediyinə görə, İran hakimiyyəti həbs olunan milli hərəkatçılarla amansız rəftar edir.
Amnesty İnternational Təşkilatının hesabatına əsasən, maydan bəri onlarla türk əsilli İran vətəndaşı (azərbaycanlılar) həbs olub və onların bir çoxu ağır işgəncələrə məruz qalıb.
Qeyri-rəsmi statistikaya görə, hazırda İranda 35 milyon türk əsilli (azəri) vətəndaş yaşayır. Onlar ana dillərində təhsil almaqdan məhrumdurlar və milli-mədəni hüquqlarının təmin edilməsinə çalışırlar.
