Azərbaycan, Bakı, 27 iyun / Trend , müxbir İ.Əlizadə/ Avropa Şurası Parlament Assambleyasının (AŞPA) Mədəniyyət, Elm və Təhsil Komitəsinin Cənubi Qafqazda mədəni irsin vəziyyətinin öyrənilməsi üzrə məruzəçisi, Böyük Britaniyalı deputat Edvard O'hara bölgəyə səfər etməkdən imtina edib. "Cənubi Qafqazda mədəni irsin vəziyyətinin öyrənlimsi üzrə məruzəçi Eduard O'hara səfərlə bağlı üzləşdiyi siyasi çətinliklərə görə, bölgəyə səfər etməkdən imtina edib", - deyə cümə günü Trend -a AŞPA-nın Mədəniyyət, Elm və Təhsil üzrə Katibliyindən bildirilib.
Trend -un arayışı: 2005-ci ildə AŞPA-nın Mədəniyyət, Elm və Təhsil Komitəsinin Cənubi Qafqazda mədəni irsin vəziyyətinin öyrənilməsi üzrə məruzəçi təyin olunub. Bununla bağlı qəbul olunan qərarda qeyd olunub ki, məruzəçi O'hara tez bir zamanda Azərbaycan, Gürcüstan və Ermənistana səfər etsin. Lakin son üç ildə onun səfəri baş tutmayıb.
Azərbaycan məruzəçinin ölkəyə səfərinə şərait yaratmağa hazır olduğunu bildirib. Rəsmi Bakı hesab edir ki, O'hara Azərbaycan ərazisindən keçməklə, ermənilərin işğalı altında olan Dağlıq Qarabağa səfər etməli və oradakı Azərbaycan abidələrinin vəziyyətini öyrənməlidir. Məruzəçi Ermənistan ərazisində olan qədim Azərbaycan abidələrinin vəziyətini də öyrənməlidir. Ermənistan isə, məruzəçinin Dağlıq Qarabağa Azərbaycan ərazisindən keçib getməsilə razılaşmır.
Ermənistan iddia edir ki, Azərbaycan Naxçıvan Muxtar Respublikasında olan qədim "erməni abidələrini" dağıdıb və məruzəçinin Naxçıvana səfərini tələb edir. Azərbaycan O'haranın Naxçıvan səfərinə də şərait yaratmağa hazır olduğunu bəyan edib.
Məlumatda qeyd olunub ki, AŞPA- nın Mədəniyyət, Elm və Təhsil Komitəsi bunu nəzərə alıb.
"Qərara alınıb ki, bu məsələ ilə bağlı AŞPA- nın sədri Marie de Puça məktub göndərilsin vəAŞPA sədrinin diqqətinə çatdırılsın ki, 30 iyun və 4 iyul tarixlərində Bakıya səfərində məruzəçinin bölgəyə getməsi məsələsini Azərbaycan rəsmiləri ilə müzakirə etsin", - deyə katiblikdən bildirilib.
Katiblikdən verilən məlumata görə, artıq Mədəniyyət, Elm və Təhsil Komitəsinin sədri, Lüksemburqdan olan deputat Anne Brasseur məruzəçi Eduard O'haranın səfərdən imtina etməsilə bağlı AŞPA sədrinə məktub göndərib. AŞPA- nın Monitorinq Komitəsinə bu məsələni gündəmdə saxlamaq tövsiyə olunub.
Məqalə müəllifi ilə əlaqə ünvanı: [email protected]
