Azərbaycan, Bakı, 01 iyul / Trend , müxbir İ.Əlizadə/ Azərbaycanın Mərkəzi Seçki Komissiyası (MSK) Avropa Şurası Venesiya Komissiyasının seçki komissiyalarının cəmiyyətin etimadını qazanmaması ilə bağlı rəyini obyektiv hesab etmir. "Seçki komissiyaları Azərbaycan cəmiyyətinin böyük əksəriyyətinin etimadını qazanıb və cəmiyyətdəki qüvvələr nisbətini düzgün əks etdirir", çərşənbə axşamı Trend -a eksklüziv açıqlamasında MSK sədri Məzahir Pənahov bildirib.
Trend -un arayışı: Avropa Şurası Venesiya Komissiyası Azərbaycanın Seçki Məcəlləsinə edilən əlavə və dəyişikliklərə rəy verib. Komissiya hesab edir ki, Azərbaycanın seçki komissiyaları cəmiyyətdəki bütün siyasi qüvvələrin etimadını qazanmalıdır. Ona görə də seçki komissiyaları yenidən formalaşdırılmalıdır. Komissiyanın katibi Canni Bukikkio bildirib ki, Venesiya Komissiyası seçki komissiyalarının tərkibinin dəyişdirilməsi ilə bağlı tövsiyə versə də, Azərbaycan hökuməti bunu nəzərə almayıb.
Pənahov deyib ki, Venesiya Komissiyasının yekun rəyində yeni tövsiyə və fikir yoxdur.
"Venesiya Komissiyasının rəyində indiyə qədər səslənən fikirlər ümumiləşdirilib. Orada yeni məsələlər yoxdur. Biz dəfələrlə seçki komissiyaları ilə bağlı məsələlərə münasibət bildirmişik. Seçki komissiyalarının indiki tərkibi ilə azad və demokratik seçkilər keçirmək mümkündür", - deyə Pənahov əlavə edib.
Azərbaycanda prezident seçkisi oktyabrın 15-də keçiriləcək.
Məqalə müəllifi ilə əlaqə ünvanı: [email protected]
