Azərbaycan, Bakı, 01 iyul/ Trend , müxbir E.Babayev/Azərbaycan parlamentində təmsil olunan müxalifətin birgə fəaliyyəti aktuallığını itirib. "Parlament müxalifətinin birliyinin alınmamasının səbəblərindən biri bir sıra millət vəkillərinin heç də əsl müxalifət olmamasıdır. Yəni Milli Məclisdə müxalifət adı altında təmsil olunan partiyaların heç də hamısı müxalifətçiliklə məşğul deyil", - bunu cərşənbə axşamı Trend -a "Müsavat" deputat qrupunun üzvü, millət vəkili Pənah Hüseyn deyib.
Trend -un arayışı: Milli Məclisdə 10 müxalifət partiyası (Böyük Quruluş, Bütöv Azərbaycan, Vətəndaş Birliyi, Müsavat, Vətəndaş Həmrəyliyi, Xalq, Demokratik İslahatlar, Ümid, Ədalət, Azad Demokratlar Birliyi) təmsil olunur. Onlardan yalnız Müsavat Partiyasını təmsil edən 4 millət vəkili və Xalq Partiyasının üzvü Pənah Hüseyn öz fəaliyyətlərini koordinasiya etmək üçün "Müsavat" deputat qrupu yaradıblar. İndiyə qədər Milli Məclisdə müxalifətin bir fraksiyada fəaliyyətinə nail olmağa üçün müəyyən cəhdlər olub.
Hüseyn bildirib ki, parlamentdəki müxalifətin birliyinə nail olmaq üçün müəyyən danışıqlar olub, amma nəticə verməyib. "Müxalifət adı altında Milli Məclisə düşən qüvvələrin heç də hamısı əsl müxalifət deyil. Onların bir qismi sözün həqiqi mənasında müxalifət deyillər" - deyən Hüseyn bildirib ki, hazırda Milli Məclisdə daha çox "Müsavat" deputat qrupu prinsipial şəkildə bu və ya digər məsələ ilə bağlı mövqeyini ortaya qoyur. "Başqa bir neçə millət vəkili də müəyyən müzakirələr zamanı belə mövqe tutur" - deyən millət vəkili konkret ad çəkmək istəməyib.
Hüseyn 1992-93-cü ildə AXC-Müsavat hakimiyyəti dövründə Baş nazir vəzifəsində işləyib. O, 2005 -ci il parlament seçkisində millət vəkili seçilib. Hüseyn Milli Məclisdə Xalq Partiyasını təmsil edir. Xalq Partiyası Hüseyn tərəfindən yaradılıb. Bir neçə il əvvəlo, bu partiyanın sədrliyindən istefa verib.
Məqalə müəllifi ilə əlaqə ünvanı: [email protected]
