Azərbaycan, Bakı, 08 iyul/ Trend , müxbirlər A.Əliyev, E.Babayev/ Hakim Yeni Azərbaycan Partiyasının (YAP) Səbael rayon təşkilatının çərşənbə axşamı keçirilən VIII konfransında təşkilatın sədri, prezident İlham Əliyev və Azərbaycanın birinci xanımı, millət vəkili Mehriban Əliyeva YAP-ın 4 - cü qurultayına nümayəndə seçiliblər. Trend -un məlumatına görə, konfransda ümumilikdə partiyanın növbəti qurultayına rayon üzrə 55 nümayəndə seçilib.
Trend -un arayışı: YAP-ın 4 - cü qurultayı avqustun əvvəlində keçiriləcək. Qurultayda partiyanın sədri, hazırki dövlət başçısı İlham Əliyevin bu ilin oktyabrında keçiriləcək prezident seçkiləri ilə bağlı namizədliyi irəli sürüləcək.
Konfransda çıxış edən rayon təşkilatının sədri, partiyanın İdarə Heyətinin üzvü Zahid Qaralov ötən konfransdan keçən dövr ərzində görülən işlər barədə məlumat verib. Hazırda təşkilatın sıralarında 20443 üzvün birləşdiyini deyən Qaralov onların təxminən 60 faizinin gənclərdən ibarət olduğunu bildirib.
Səbael rayon İcra Hakimiyyətinin başçısı Sahib Ələkbərov isə, bildirib ki, Səbael rayonundakı 39 seçki məntəqəsi seçkilərə tam hazırdır. "Amma səsvermə gününə qədər seçicilərlə sıx işləməliyik. Elə çalışmalıyıq ki, İlham Əliyevin qarşımıza qoyduğu vəzifələri layiqincə yerinə yetirək" - deyə o əlavə edib.
Azərbaycan Dövlət Pedaqoji Universitetin rektoru Yusif Məmmədov çıxışında rəhbərlik etdiyi təhsil müəssisəsində 8091 nəfər YAP üzvünün olduğunu bildirib.
Konfransda çıxış edən Milli Məclisin sədr müavini, YAP İdarə Heyətinin üzvü Bahar Muradova bildirib ki, bu gün YAP alternativsiz siyasi qüvvədir. Prezident seçkilərinə toxunan vitse-spiker hakim partiyanın güclü namizədinin olduğunu deyərək, bu faktın mühüm amil olduğunu vurğulayıb. Onun fikrincə, Prezident İlham Əliyevin rəhbərliyi ilə qazanılan uğurlar və uğurların xalq tərəfindən dəstəklənməsi seçkinin nəticələrini şərtləndirir.
YAP 1992-ci ildə, o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]