Azərbaycan, Bakı, 15 iyul/ Trend , müxbir A.Qasımova/ Ermənistan hökumətinə ölkədə demokratik və bazar islahatlarının inkişaf dinamikasını bərpa etmək lazımdır. ABŞ Dövlət Katibi müavininin köməkçisi Metyu Brayza belə hesab edir.
"Hazırki konkret vaxtda biz ümid edirik ki, Ermənistan hökuməti 19 fevral seçkiləri zamanı pozulmuş demokratik və bazar iqtisadi islahatların inkişaf dinamikasını bərpa edəcək", - Brayza çərşənbə axşamı Trend -a bildirib.
Ermənistanın xarici işlər naziri Edvard Nalbandyan, Vaşinqtona rəsmi səfəri çərçivəsində, bazar ertəsi ABŞ Dövlət Katibi Kondoliza Raysla danışıqlar aparıb.
Brayza bildirib ki, iki xarici siyasət idarəsinin rəhbərləri arasında görüş konstruktiv olub.
ABŞ -ın Ermənistanla münasibətinə toxunan Brayza vurğulayıb ki, münasibətlər "ölkələrimiz arasında tarixi baxımdan güclü olub".
Nalbandyanın səfər proqramında ABŞ hakimiyyətinin icraedici və qanunverici qollarının rəhbərləri ilə, o cümlədən Dövlət Katibinin köməkçisi Daniyel Frid, Ermənistan-Azərbaycan Dağlıq Qarabağ münaqişəsinin nizamlanması üzrə ATƏT-in Minsk Qrupunun həmsədri Brayza ilə görüşləri də var.
