Azərbaycan, Bakı, 16 iyul/ Tr , müxbir E.Babayev/ Müxalif Azərbaycan Milli İstiqlal Partiyası (AMİP) Mərkəzi Seçki Komissiyasının (MSK) sədri Məzahir Pənahova müraciət edib. "Müraciətdə tələb etmişik ki, MSK sədri bizim partiyaya qarşı siyasi bəyanatlar verən üzvlərinə qarşı ölçü götürsün. Əks təqdirdə, biz bu qurumu məhkəməyə verəcəyik", bunu çərşənbə günü Trend -a AMİP-in sədr müavini Əli Orucov deyib.
Trend -un arayışı: İyunun 7-də AMİP bir qrup üzvlərinin adının seçici siyahılarına düşməməsi məsələsi ilə bağlı məsələ qaldırmışdı. Partiya bildirmişdi ki, ümumilikdə 35-dən artıq partiya üzvünün adı siyahıda yoxdur. MSK təmsilçiləri isə partiyanı bu məsələni siyasiləşdirməkdə ittiham etmişdi.
Orucov bildirib ki, konkret olaraq MSK-nın mətbuat xidməti Azər Sarıyev AMİP-in gücünün olmadığını bildirib. "MSK nümayəndəsi siyasi mövqe sərgiləyib. Müraciətdə buna etiraz etmişik və siyasi bəyanatlar verən şəxslərin cəzalandırılmasını istəmişik. MSK bitərəf qurumdur. MSK-nın vəzifəsi o deyil ki, hər hansı partiyanın gücünün nədən ibarət olduğunu müəyyən etsin. Bu o deməkdir ki, MSK-nın ədalətli seçki keçirəcəyi şübhə altına düşür", - deyə o əlavə edib.
MSK-nın mətbuat xidmətinin rəhbəri Sarıyev isə çərşənbə günü Trend -a bildirib ki, AMİP bir sıra üzvlərinin adının seçici siyahısında olmasını siyasiləşdirib. Partiya bəyan edib ki, guya hansısa üzvlərinin adları siyahıya AMİP üzvü olduqları üçün salınmayıb. "Mən isə bundan sonra bildirmişəm ki, AMİP elə güclü partiya deyil ki, biz onların üzvlərinin adlarını siyahıya daxil etməmək üçün hansısa addımlar ataq. Əslində, məsələni onlar siyasiləşdiriblər. Seçici siyahıları tərtib olunarkən onların hansı partiyaya mənsub olması nəzərdən keçirilmir. Əgər hər hansı şəxsin adı siyahıda yoxdursa, bunun üçün MSK-dakı "qaynar xətt"ə müraciət edə və adını siyahıya daxil etdirə bilər. Bunu siyasiləşdirməyə ehtiyac yoxdur", - deyə Sarıyev əlavə edib.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
