Azərbaycan, Bakı, 17 iyul/ Trend , müxbir E.Babayev/ Azərbaycanın müxalifət partiyaları bir-birlərinin hakimiyyətə alternativ olmadıqlarını bəyan ediblər. "Qarşıdan gələn prezident seçkisinin əsas favoriti İlham Əliyev olacaq və mən Müsavat başqanı İsa Qəmbəri hakimiyyətə əsas alternativ saymıram", - deyə cümə axşamı Trend -a Azərbaycanın müxalif Sosial Demokrat Partiyasının (ASDP) həmsədri Araz Əlizadə bildirib.
Trend -un arayışı: Azərbaycanda prezident seçkisinin oktyabrın 15-də keçirilməsi nəzərdə tutulur. Mərkəzi Seçki Komissiyası bu ayın sonunda seçkiyə rəsmən start verəcək və seçki gününün dəqiq tarixini açıqlayacaq.
Müsavat Partiyasının başqanı İsa Qəmbər bəyan edib ki, seçkidə əsas mübarizə hakimiyyətin namizədi, hazırki prezident İlham Əliyevlə onun arasında gedəcək. Onun fikrincə, digər müxalifət qüvvələri də bunu dərk edirlər və Müsavat və hakimiyyətdən başqa heç bir qüvvə seçki barədə hakimiyyətə gəlmək vasitəsi kimi düşünmür.
Əlizadə Müsavat başqanının fikirlərini geniş şərh etmək istəməyib. "Qəmbərin dediyindən belə çıxır ki, dünyada bir Allah var, bir də İsa Qəmbər. Qəmbər 1992-93-cü ildə Milli Məclisdə spiker olanda millət vəkillərini elə parlamentin zalında döyürdülər. Əgər Qəmbər prezident olsa, yəqin ki, bu dəfə deputlatları öldürəcəklər", - deyə ASDP həmsədri əlavə edib.
Müxalif Azərbaycan Demokrat Partiyasının (ADP) sədri Sərdar Cəlaloğlu isə cümə axşamı Trend -a deyib ki, seçkidə müstəqil namizədlər müxalifət liderlərindən daha ciddi uğur əldə edə bilərlər: "Mənə belə gəlir ki, ədalətli seçki olarsa, müxalifətdə olmayan müstəqil şəxslər alternativ kimi çıxış edib, uğur əldə edə bilərlər. Siyasi partiyanın lideri olmaq, xalq hərəkatında itştirak etmək, uzun müddət siyasətdə olmaq hakimiyyətə gəlmək üçün əsas arqumentlər ola bilməz. Bunlar başqa kriteriyalardır və şəxsin cəmiyyətdə, tarixdə rolunu müəyyən edən faktorlardır. Seçkidə kimin nə nəticə əldə edəcəyi seçki kampaniyası zamanı müəyyən olacaq. Aparılan kampaniya nəticəsində indiki reytinqlər dəyişəcək". Cəlaloğlu Müsavat başqanının bəyanatının isə qüsurlu olduğunu bildirib. "Nədənsə, biz başqalarını kiçiltməklə özümüzü böyüdəcəyimizi düşünürük və bu tamamilə yanlışdır. Başqa partiyaların mövqeyini kiçiltmək insanı böyütmür", - deyə o bildirib.
Yaşıllar Partiyasının prezidentliyə namizədi, təşkilatın sədri Mais Güləliyev isə cümə axşamı Trend -a deyib ki, hər bir partiyanın yüksəliş və enmə dövrü olur. "Müsavatın inkişaf dövrü 90-cı illərin əvvəllərindən başlayıb. Bu inkişafın zirvə dövrü 2003-cü il prezident seçkisi idi. Bu seçkidəki məğlubiyyətdən sonra Müsavatın tənəzzül dövrü başlayıb", - deyən partiya sədri vurğulayıb ki, Müsavatın ideoloji bazası artıq cəmiyyətin tələblərinə, inkişaf səviyyəsinə cavab vermir. "Müsavatın hakimiyyətdən fərqli heç bir proqramı yoxdur. Müsavat NATO, transmilli korporasiyaların Azərbaycandakı fəaliyyəti, neft kontraktları və sair məsələlərlə bağlı hakimiyyətdən daha mütərəqqi ideyalar irəli sürürmü? Xeyr. Belə olan halda digər partiyaların inkişafını qısqanmaq lazım deyil", - deyən Güləliyev onu da bildirib ki, Müsavat yalnız hakimiyyəti tənqid etməklə uğur əldə etməyə çalışır və bu yol vətəndaş müharibəsinə aparan yoldur: "Hakimiyyət məqsəd olmamalıdır, hakimiyyət problemlərin həlli üçün vasitə olmalıdır. Müsavat isə hakimiyyətə məqsəd kimi baxır".
Məqalə müəllifi ilə əlaqə ünvanı: [email protected]
