İran, Tehran, 28 iyul / Trend , müxbir R.Azadbəxş/ İranın Təhlükəsizlik Orqanları "Deyli Telegraf" qəzetinin Tehranda "Hizbullah" hərəkatı üçün hazırlanan hərbi sursatların partlayışı nəticəsində 15 əsgərin ölümü ilə baglı yaydığı xəbəri təkzib edib. "Bizdə Tehranda partlayışla əlaqədar heç bir informasiya yoxdur və belə bir hadisə baş verməyib", - deyə adının çəkilməsini istəməyən İran İnqilab Keşikçiləri Korpusunun (Sepah) rəsmisi Trend -a bildirib.
Britaniyalı "Deyli Telegraf" şənbə günü məlumat yayıb ki, iyulun 19-da Tehranda "Hizbullah" üçün nəzərdə tutulan silah-sursatın daşınması zaman partlayış baş verib və nəticədə15 İran əsgəri həlak olub. Qəzet bildirir ki, İsrailin İrana ehtimal olunan hücumuna qarşı Sepah "Hizbullah"ı sürətlə silahlandırir.
Sepahdakı mənbə bildirib ki, son on gündə Tehranda partlayışla baglı heç bir rəsmi məlumat olmayıb. Onun sözlərinə görə, Tehranda eşidilən partlayış səsi şəhərin şərqində yerləşən (Qəzvin-Məşhəd caddəsi) sursat zavodunda texniki nasazlıq ucbatından baş vermiş hadisə ilə, yaxud həmin məntəqədə hərbi qüvvələrin təlimlər keçməsi ilə bağlı ola bilər.
Mənbənin məlumatına əsasən, İranda heç zaman yük maşınları və yerüstü nəqliyyat vasitələrilə hərbi sursat daşınılmır, həmçinin İranda hər zaman müxtəlif hərbi qərargahlar arasında silah və sursat mübadilə olunur və bu adi bir haldır: "Hizbullah-a sursatların göndərilməsi barədə verilən xəbər absurddur", - deyə o bildirib.
Keçən aylarda İranda müxtəlif partlayış aktları barədə məlumat yayılıb. İRNA Agentliyinin may ayında yaydığı məlumata əsasən, Şiraz şəhərində ondan artıq nəfərin ölümü və 200 nəfərin yaralanması ilə nəticələnən partlayış "xarici qüvvələrin İrana hazırladığı terror və təxribart planı" kimi dəyərləndirilib.
Məqalə müəllifi ilə əlaqə saxlamaq üçün elektron ünvan [email protected]