Azərbaycan, Bakı,16 sentyabr / Trend , müxbir S.İsmayılbəyli/ Azərbaycanda keçiriləcək prezident seçkisi ilə bağlı ölkəyə əlavə şəffaf seçki qutuları gətiriləcək.
"Əlavə şəffaf seçki qutuları Danimarkadan gətiriləcək", çərşənbə axşamı Trend -a Mərkəzi Seçki Komissiyasının (MSK) Beynəlxalq əlaqələr şöbəsinin müdiri Rövzət Qasımov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, hazırki dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək. Prezidentliyə namizədlərin təbliğat-təşviqat kampaniyası sentyabrın 17-də başlayacaq və 28 gün davam edəcək.
Azərbaycana ilk şəffaf seçki qutuları 2003-cü il prezident seçkisində gətirilib və tətbiq olunub.
Qasımov bildirib ki, hazırda prezident seçkisi üçün lazım olacaq şəffaf seçki qutularının sayı müəyyənləşdirilir.
"Seçki qutularının bəziləri istifadə üçün yararsız vəziyyətə düşüb. Onların sayı yaxın günlərdə müəyyənləşdiriləcək və yeni şəffaf qutuların sayı barədə Danimarka tərəfinə sifariş veriləcək", Qasımov əlavə edib.
Azərbaycanda 5 000-dən artıq seçki məntəqəsi fəaliyyət göstərir. Hər məntəqəyə bir daşınan və daşınmaz şəffaf qutu qoyulur.
Məqalə müəllifi ilə əlaqə ünvanı: [email protected]