Azərbaycan, Bakı, 28 oktyabr/ Trend , müxbir E.Tariverdiyeva/ Gürcüstan parlamentinin eks-spikeri Nino Burcanadze böyük siyasətə qayıtdıqdan sonra, Qərb üçün prezident vəzifəsinə ən münasib namizəd olub.
"Yeni prezidentin hakimiyyətə gəlməsi ilə ABŞ - ın Saakaşvili qarşısındakı açıq öhdəlikləri qüvvədən düşəcək və Qərbin maraqları baxımından, Burcanadze prezident kimi daha səmərəli olacaq", - Rusiyanın Milli Strategiya İnstitutunun prezidenti Mixail Remizov çərşənbə axşamı telefonla Trend -a bildirib.
Burcanadze, bazar ertəsi Tbilisidə keçirilmiş brifinqdə jurnalistlərə bildirib ki, ölkə hakimiyyətinə müxalif siyasi partiya - DHVG (Demokratik Hərəkat - Vahid Gürcüstan) partiyasını yaratmaq qərarına gəlib.
Burcanadze Gürcüstan prezidenti Mixail Saakaşvili ilə 2004-cü ildə "Qızılgül inqilabı"nın əsas liderləri olublar. O, spiker olduğu parlamentdə prezident partiyasının fraksiyasına daxil idi. Bu illər ərzində Burcanadze iki dəfə prezidentin səlahiyyətlərini icra edib. Lakin ötən ilin noyabrında Tbilisidə müxalifətin nümayişinin sərt şəkildə yatırılmasından sonra, hazırki rejimdən uzaqlaşıb. Burcanadze, mayda keçirilmiş parlament seçkiləri zamanı hakim partiyanın seçki siyahısında liderlikdən imtina etdikdən sonra, "Demokratik İnkişaf Fondu" qeyri - hökumət təşkilatını yaradıb.
Burcanadze Gürcüstan və Cənubi Osetiya arasında yüzlərlə insanın həlak olduğu hərbi əməliyyatlardan sonra Financial Times Deutshland-a müsahibəsində bildirib ki, müharibə ilə əlaqədar prezident Saakaşvili "çox ağır vəziyyətə" düşüb.
Burcanadzenin qayıdışı prezident kürsüsünə ciddi iddiadır. Analitiklər Qərb baxımından məhz onu ən rahat və münasib namizəd hesab edirlər.
Burcanadze ilə əlaqə saxlamaq mümkün olmayıb.
Gürcüstan müxalifəti amili ölkənin siyasi həyatında vacib dinamika yaradır,- Remizov hesab edir. "Gürcüstanın özünün və onun Avroatlantik tərəfdaşları və hamilərinin maraqları baxımından, Burcanadze prezident vəzifəsində optimal sima olardı", - o bildirib.
Rusiyalı politoloqun rəyinə görə, Burcanadze Rusiya və Qərbə münasibətdə Saakaşvilidən fərqlənməsə də, Saakaşvilinin çiyinlərindəki səhv yükü onun onda yoxdur.
Gürcüstan üzrə britaniyalı ekspert Kseniya Skvortsova (Ksenia Skvortsova) da Burcanadzeni seçkilərdə prezident Saakaşviliyə ən ağlabatan rəqib hesab edir. "O, Saakaşvilinin hakim partiyasının ən təhlükəli rəqibidir", - Risklərə Nəzarət Mərkəzinin (London) eksperti Skvortsova telefonla Trend -a bildirib.
"Nino Burcanadze Saakaşvili üçün təhlükəli rəqibə çevrilir və gələcəkdə onu əvəzləyə bilər", - o hesab edir.
Lakin Gürcüstanın eks - prezidenti Eduard Şevardnadze hesab edir ki, Burcanadzenin prezidentliyə şansı yoxdur.
Onun rəyinə görə, Burcanadze prezident Saakaşvilinin siyasətindən çox gec uzaqlaşıb. "Burcanadze bir qədər tez getsəydi, bu başqa söhbət olardı. Ümumiyyətlə, ağıllı qadın olsa da, vaxtında getməyə cəsarəti çatmadı. Düşünürəm ki, onun böyük uğuru olmayacaq. Belə ki, Gürcüstanın bütün bu ağır illərində o, prezident Saakaşvili ilə birgə işləyib", - Şevardnadze Tbilisidən telefonla Trend -a bildirib.
Müəlliflə əlaqə saxlamaq üçün elektron ünvan: [email protected]
